Վլադիմիր Հակոբյանը 10-րդ տեղը զբաղեցրեց
Դուբայում ավարտվեց շախմատի օփեն խոշոր միջազգային մրցաշարը, որին մասնակցեցին Հայաստանի 6 ներկայացուցիչ:
Ավաղ, մեր գրոսմայստերներ Վլադիմիր Հակոբյանը եւ Գաբրիել Սարգսյանը վերջին 9-րդ տուրում ռիսկի չդիմեցին եւ չկարողացան հաղթել իրենց մրցակիցներին: Արդյունքում նրանք վաստակեցին 6,5-ական միավոր եւ զրկվեցին մրցանակային տեղ զբաղեցնելու հնարավորությունից:
Վլադիմիր Հակոբյանը մրցաշարը ավարտեց 10-րդ տեղում եւ պարգեւատրվեց 1300 ԱՄՆ դոլարով, իսկ Գաբրիել Սարգսյանը ճանաչվեց 13-րդը` վաստակելով 1000 դոլար:
Մրցաշարի միանձնյա հաղթող դարձավ ռուսաստանցի Ալեքսանդր Ռախմանովը, որը 7,5 միավոր վաստակեց:
Մեր մյուս մասնակիցներից Հովիկ Հայրապետյանը 6 միավորով զբաղեցրեց 34-րդ տեղը, Տիգրան Լ. Պետրոսյանը` 62-րդ հորիզոնականը (5 միավոր), Լիլիթ Գալոյանը` 76-րդը (5), Մարկ Բասենյանը` 95-րդը (4,5):
