Տաքարյուն հարձակում Հայաստանի համար
Այն, որ իտալացի մասնագետները աչքի են ընկնում իրենց տակտիկական խորիմացությամբ, կասկած չի հարուցում:
Ֆուտբոլային մեծ տակտիկների թվին են դասվում աշխարհի չեմպիոններ Էնցո Բեարզոտը, Մարչելո Լիպին, ինչպես նաեւ հանրահայտ Ֆաբիո Կապելոն եւ Ջիովանի Տրապատոնին: Նրանց հետեւորդներից է նաեւ իտալացիների ներկայիս գլխավոր մարզիչ Չեզարե Պրանդելին:
Ինչպես նշում են իտալական լրատվամիջոցները՝ 55-ամյա մասնագետը Հայաստանի հավաքականի հետ խաղում յուրօրինակ տակտիկա է մշակել: Ըստ դրանց վերջինս Երեւանում պատրաստվում է երկու ֆիզիկապես ուժեղ հարձակվողների` Մարիո Բալոտելիի եւ Օսվալդոյի օգնությամբ պարզապես ճզմել դաշտի տերերի պաշտպանությունը:
Արդյոք այդ մարտավարությունը կարդարացնի իրեն, ցույց կտա բուն խաղը, որը տեղի կունենա հոկտեմբերի 12-ին, «Հրազդան» մարզադաշտում: Համենայնդեպս, իտալական ԶԼՄ-ները անհամբերությամբ սպասում են այդ տաքարյուն երկյակի խաղին:
