«Գագիկ Բեգլարյանը փորձում է քայլեր կիրառել»
Աբովյան եւ Չարենցավան քաղաքների երթուղիները սպասարկող ավտոբուսների վարորդներն այսօր դուրս են եկել երթուղի, չնայած շարունակում են բողոքել «Գագիկ Ծառուկյան» հիմնադրամի անվճար ավտոբուսների գործունեության դեմ:
Երթուղին սպասարկող «Քինգ Դելյուքս» ընկերության ղեկավարությունը դիմել է տրանսպորտի եւ կապի նորանշանակ նախարար Գագիկ Բեգլարյանին, ով, ըստ ընկերության ղեկավարության, փորձում է քայլեր կիրառել:
Հիշեցնենք, որ ԲՀԿ առաջնորդ Գագիկ Ծառուկյանի ու նրա սանիկ, «Քինգ դելյուքս» ընկերության սեփականատեր Արթուր Հարությունյանի ջրերը մի առվով չհոսեցին, երբ սանիկը ընտրություններից առաջ որոշեց հանրապետական դառնալ եւ աշխատել այլ թիմի համար:
Որոշ տեղեկություններով, կոնֆլիկտն այնքան է խորացել, որ Արթուր Հարությունյանը դրա պատճառով Հայաստանում չէ: Մի քանի հարց ուղղեցինք ընկերության տնօրեն Արթուր Դալլաքյանին:
- «Գագիկ Ծառուկյան» բարեգործական հիմնադրամը ի պատասխան ձեր բողոքի հայտարարեց, որ բարեգործությունը շարունակելու է, ի՞նչ եք պատրաստվում անել:
- Ո՞ւմ հաշվին է շարունակելու: Գոնե թող բարի լինեն այդ դեպուտատ կոչեցյալները փորձեն կարդալ օրենքը ու հասկանալ' բարեգործություն ինչ է նշանակում, որ եթե մի բարեգործություն թույլտվություն չունի, չի կարելի բարեգործություն անել: Այսօր անօրինական բարեգործություն են անում, ո՞ւմ հաշվին' մեր հաշվին, մեր ընկերության հաշվին: Լավ, ուզում է բարերարություն անել, փող փորձի ուրիշ երթուղիներ էլ մտնի, շատ երթուղիներ կան: Չէ, մտադրված մեր երթուղիների դեմ է, միտք ունի ոչնչացնե՞լ մեր ընկերությունը, ոչնչացնե՞լ աշխատատեղերը:
- Ասել է թե' դուք դիտավորությո՞ւն եք տեսնում կոնկրետ Ձեր ընկերության դեմ:
- Միանշանակ: Ուրիշ ձեւ չեմ կարող հասկանալ: Մարդ պետք է իր կյանքում ստեղծարար լինի, ոչ թե քանդելաոճով մտածի:
- Դուք եւ Արթուր Հարությունյանը հանրապետական եք, հնարավո՞ր է, դրա համար փորձում են Ձեզ ճնշել մարզում:
- Մեզ չի կարա որեւէ մեկը փորձի ճնշի: Որեւէ մեկը չունի էդքան հնարավորություն, որ կարողանա մեզ ճնշի: Ինքը շատ-շատ կարա նման տիպի քայլեր անի, փորձի անօրինական բաների մեջ մտնել:
- Դուք ասում եք' ապօրինի գործունեություն է ծավալում հիմնադրամը, ինչպե՞ս կարող է ապօրինի գործել, եթե կա տրանսպորտի եւ կապի նախարարություն, արդյոք նախարարությունը չի՞ վերահսկում իրավիճակը:
- Մենք դիմել ենք համապատասխան մարմիններին եւ ստացել ենք պատասխան, որ նման անվճար բարեգործական երթուղի ոչ կառավարությունում է գրանցված, ոչ էլ համապատասխան թույտվություն է ստացել տրանսպորտի նախարարության կողմից: Այսինքն' ինքն այսօր գործում է անօրինական դաշտում, որն իրենց ոճի մեջ է, կարելի է ասել:
- Եթե անօրինական է իրենց գործունեությունը, ինչո՞ւ նախարարությունը չի վերահսկում, որ դադարեցվի:
- Այդ հարցը պետք է իրենց տաք: Իհարկե մենք դիմել ենք: Նախկին նախարարից ոչ մի պատասխան չստացանք: Բայց այսօրվա նախարարի կողմից սպասելիքներ ունենք, որովհետեւ զգացվում է, որ քայլեր է փորձում կիրառել:
- Դիմել եք Գագիկ Բեգլարյանի՞ն:
- Այո: Մեզ համապատասխան բաժնից տեղյակ պահեցին, որ հարցը դրված է, որ ժամանակին այս անօրինականությունը վերացնեն: Դիմել ենք նաեւ տնտեսական մրցակցության պետական հանձնաժողովին:
- Եթե լուծում չլինի, ի՞նչ եք անելու, շարունակելո՞ւ եք գործադուլը:
- Գործադուլն անում են վարորդները: Ես կողմնակից չեմ գործադուլի միջոցով հարցեր լուծելուն, որովհետեւ երթուղիները պետական նշանակություն ունեն: Չի կարելի երթուղիները դադարեցնել, բայց վարորդների իրավիճակն էլ ենք հասկանում:
- Հիմնադրամից ասում են, որ Ծառուկյանը բարեգործություն է անում, իսկ դուք դեմ եք իրենց բարեգործությանը:
- Եթե բարեգործություն է ուզում անի, թող իր բիզնեսի հաշվին անի., ոչ թե մեր: Մենք միշտ էլ բարեգործություն արել ենք, ոչ մի անգամ չենք հայտարարել այդ մասին, որովհետեւ դա ընդունել ենք որպես պարտականություն: 2 հատ կամ 50 հատ ՊԱԶ առնելով՝ բարեգործ դառա՞ն:
- Դիմելո՞ւ եք դատարան:
- Ոչ, սպասում ենք պատկան մարմինների պատասխանին:
Զրուցեց Մարինե Խառատյանը
