ԱԺ-ն չի քննարկի «Հարսնաքարի» հարցը

Աջակցիր «Ա1+»-ին

ԱԺ պաշտպանության, ազգային անվտանգության եւ ներքին գործերի հարցերով հանձնաժողովը առաջիկայում չի պատրաստվում քննարկել «Հարսնաքարի»  դեպքն ու գործի քննության առթիվ քննարկում կազմակերպել: Այս մասին մեզ հետ զրույցում ասաց հանձնաժողովի նախագահ Կորյուն Նահապետյանը:

Ի դեպ,  Ռուբեն Հայրապետյանը, ով չնայած մանդատը վայր դնելու մասին իր հայտարարությանը, շարունակում է մնալ պատգամավոր, այս հանձնաժողովի անդամ է: Նշենք, որ ԱԺ նախագահ Հովիկ Աբրահամյանը մերժել է  «Հարսանքարի» դեպքի գործով իրավապահների հետ ԱԺ-ում հանդիպում կազմակերպելու եւ հասարակությանը հուզող հարցերով նրանց դիմելու ԱԺ չորս խմբակցությունների' ՀԱԿ-ի, ՀՅԴ-ի, Ժառանգության եւ ԲՀԿ-ի առաջարկը:

Հովիկ Աբրահամյանը պատճառաբանել է, թե ինքը պաշտոնատար անձանց հետ հանդիպումներ կազմակերպելու իրավասություն չունի' հայտարարելով, որ ձեռնպահ է մնում գործի քննության համար պատասխանատու իրավապահ մարմինների գործունեությանը օրենքով չնախատեսված որևէ միջամտությունից:

Ներկայացնում ենք մեր զրույցը Կորյուն Նահապետյանի հետ:  

- «Հարսնաքարի» գործը հասարակության ուշադրության կենտրոնում է, արդեն իսկ որոշակի կասկածներ կան քննության հետ կապված, Ձեր ղեկավարած հանձնաժողովը չի՞ պատրաստվում քննարկում կազմակերպել ԱԺ-ում, հետեւել, թե ինչ ձեւով է ընթանում քննությունը, ովքեր են պատժվում, իրական մեղավորները պատժվո՞ւմ են, թե՞ ոչ:

- Ցանկացած քրեական գործով իրականացվող նախաքննության հետ կապված պետք է հստակ հասկանալ յուրաքանչյուր պետական մարմնի եւ պաշտոնատար անձի իրավասությունը: Նախ' քրեական գործի նախաքննությանը հետեւել մենք կարող ենք միայն այն լիազորությունների շրջանակում, որ օրենքը մեզ վերապահել է: Մենք չենք կարող որեւէ կերպ մասնակցություն բերել այդ գործընթացին, որովհետեւ քանի դեռ քրեական գործով նախաքննությունն իրականացվում է եւ քննությունը դեռ չի ավարտվել, պետք է հասկանալ, թե ինչպիսի մասնակցություն կարող է ունենալ ԱԺ-ն կամ նրա որեւէ հանձնաժողով: ... Ոչ միայն հանձնաժողովը, այլ ընդհանուր առմամբ քաղաքական բոլոր ուժերը հետեւում են այն գործընթացներին, որոնք կապված են այդ միջադեպի հետ:

- Կոնկրետ հանրապետական կուսակցությունը ցավակցություն չհայտնեց դեպքի առթիվ: Ո՞րն է Ձեր գնահատականը:

- Դուք չարաչար սխալվում եք: Հանրապետական կուսակցության բազմաթիվ ներկայացուցիչներ եւս ցավակցություն են հայտնել, եւ իրենց վերաբերմունքն են արտահայտել կոնկրետ այդ միջադեպի հետ կապված: Ինչ վերաբերում է միջադեպի հետ կապված վերաբերմունքին, ապա յուրաքանչյուր բանական մարդ մարդկային մեծ ցավ է ապրում կատարվածի համար: Մահացել է հայ երիտասարդ եւ չեմ կարծում, որ այստեղ պետք է շահարկումներ անել, թե ով որ պահին նման հայտարարություններ արեց: Կարծում եմ' յուրաքանչյուր հայ մարդու արձագանքն այս պարագայում շատ անկեղծ է: Մարդ է մահացել եւ չպետք է քաղաքականացնել եւ շահարկել' փորձելով ցույց տալ, թե ով ավելի ակտիվ եւ շահագրգիռ վերաբերմունք է ցույց տալիս այդ իրավիճակում' ունենալով իր նպատակադրումները, որոնք ոչ մի կերպ պայմանավորված չեն այդ դեպքի հետ: Մենք ուշադիր հետեւելու ենք այն զարգացումներին, որոնք տեղի են ունենալու այս քրեական գործի շրջանակներում: Իսկ միջամտել որեւէ կերպ քրեական գործով նախաքննությանը, կարծում եմ, մենք չենք կարող: ԱԺ-ի որեւէ մարմին չի կարող միջամտություն ունենալ: Հուսով եմ, որ բոլոր մեղավորները կանգնելու են դատարանի առջեւ եւ պատասխան են տալու իրենց կատարածի համար:

- Ձեր ղեկավարած հանձնաժողովը քննության որեւէ փուլում կքննարկի՞ այդ հարցը, թե՞ ընդհանրապես բացառում եք նման հարցի քննարկումը:

- Ընդհանրապես՝ ես որեւէ բան չեմ բացառում: Իսկ ինչ վերաբերում է առհասարակ որեւէ հարցով քննարկումների կազմակերպմանը կամ գնահատականների հնչեցմանը, ապա կարծում եմ, կարող են լինել քաղաքական գնահատականներ, բարոյական գնահատականներ, իրավական գնահատականը կոնկրետ այդ միջադեպի հետ կապված պետք է տան իրավասու պետական մարմինները:

Միայն նրանց իրավական գնահատականից հետո մենք կարող ենք վերջնական եզրահանգումներ անել, թե ով ինչպիսի մասնակցություն է ունեցել այս միջադեպին:

... Յուրաքանչյուր հանցագործության հետ կապված շատ կարեւոր է պարզել դրան նպաստող պայմաններն ու պատճառները եւ այս քրեական գործով նույնպես քննություն իրականացնող մարմինները կպարզեն, թե որոնք են եղել այս հանցագործության պատճառներն ու պայմանները: Իրոք, մտահոգիչ որոշ պայմաններ կան, որոնք կպահանջեն հետագայում կոնկրետ օրենսդրական լուծումներ: Չեմ բացառում, որ առաջարկություններ ներկայացվեն մասնավոր պահնորդական գործուենության մասին օրենքում փոփոխություններ կատարելու համար:

- Հայտնի է, որ Ձեր ազգականը' Սամվել Ալեքսանյանը, ում աջակցությամբ դուք ընտրվեցիք պատգամավոր, ունի բազմաթիվ թիկնապահներ, հնարավո՞ր է դա ձեզ ինչ-որ կերպ կաշկանդում է, որ ավելի ազատորեն քննեք «Հարսանքարի» հարցը:

- Ինչ վերաբերում է իմ գործունեությունը ինչ որ առնչությունների հետ կապելու, ապա ես այստեղ որեւէ հիմք չեմ տեսնում կասկածի տակ դնելու իմ գործունեթյունը եւ կապել ինչ-ինչ հանգամանքների հետ:

- Իսկ ընտրվելուց հետո Դուք շնորհակալություն հայտնեցի՞ք Սամվել Ալեքսանյանին:

- Ես շնորհակալություն են հայտնել իմ բոլոր ընտրողներին, որոնք շատ ակտիվ մասնակցություն են ունեցել եւ ավելի քան 20 հազար ընտրող վստահել է ինձ' ներկայացնելու իր շահը ԱԺ-ում:

Զրուցեց Մարինե Խառատյանը