"Հանրապետականի ծոցում է ապրել ԲՀԿ-ն վերջին 5 տարիներին"
ՀԱԿ վերջին հանրահավաքում Տեր-Պետրոսյանը հայտարարեց, թե որոշ քաղաքական ուժեր, «այդ թվում նաեւ Հայ Ազգային Կոնգրեսից անջատված տարրեր, անցյալ տարվա հոկտեմբերից սկսած պայքարել եւ, հակառակ իրենց կանխատեսումների չարդարացման, այսօր էլ շարունակում են պայքարել «Բարգավաճ Հայաստան» կուսակցության ընդդիմացումը եւ քաղաքական մյուս ուժերի, հատկապես Կոնգրեսի հետ, համագործակցությունը վիժեցնելու համար, նպատակ հետապնդելով «Բարգավաճին» կրկին մղել Սերժ Սարգսյանի գիրկը»։ Քանի որ "Ազատ դեմոկրատներ" կուսակցության անդամ Ալեքսանդր Արզումանյանը եւս նախկին ՀԱԿ-ական է, այդ առթիվ զրուցեցինք նրա հետ: Նշենք, որ ԱԳ նախկին նախարարն ընտրվել է ԱԺ արտաքին հարաբերությունների հանձնաժողովի փոխնախագահ:
- Պարոն Արզումանյան, վերջին հանրահավաքում Լեւոն Տեր-Պետրոսյանն ասաց, որ պետք է հնարավորություն տրվի ԲՀԿ-ին դուրս գալ Սերժ Սարգսյանի տիրապետության տակից, այնինչ ոմանք իրենց գնահատականներով հրում են ԲՀԿ-ին Սերժ Սարգսյանի գիրկը: Համամի?տ չեք:
- Դա Լեւոն Տեր- Պետորսյանի տեսակետն է, որը ես հարգում եմ: Լեւոն Տեր-Պետրոսյանն ունի իրավունք ունենալ ցանկացած տեսակետ: Մյուս կողմից`ի?նչ է նշանակում` հրում են դեպի հանրապետականի գիրկը: Հանրապետականի ծոցում է ապրել այդ կուսակցությունը վերջին 5 տարիների ընթացքում: Նույն ռեժիմի բաղկացուցիչ մասն է, որը պատասխանատվություն է կրում վերջին 5 տարիներին Հայաստանում կատարված ամեն ինչի համար, այդ թվում եւ մարտի 1-ի սպանդի: Որեւէ մեկը որեւէ մեկի չի հրում որեւէ դաշտ, որի ծնունդն է այդ սուբյեկտը: Ես դեռեւս չեմ տեսել այդ տարանջատումը: Ժամանակը ցույց կտա, կտեսնենք:
- Ասել է թե` համաձայն չե?ք Տեր- Պետրոսյանի հետ, որ այժմ հնարավոր է ԲՀԿ-ին դուրս բերել Սերժ Սարգսյանի ազդեցությունից:
-Ես չեմ մեկնաբանում քաղաքական գործիչների տեսակետները: Ես կարծում եմ, այս կարծիքը շատերն են կիսում, որ ԲՀԿ-ն լինելով կոալիցիայի բաղկացուցիչ մաս, պատասխանատվություն կրելով թե կառավարության ծրագրի համար, թե բոլոր մյուս գործողությունների համար, թե քվեարկելով մարտի 1-ին հատուկ դրություն հայտարարելու համար, թե ողջունելով բանակի ապօրինի ներգրավումը, ամեն ինչով մաս է կազմում այդ ռեժիմին: Իսկ ասել, թե հնարավորություն է պետք տալ...: Այդ կուսակցությունը թող հայտարարի, թող խոսի իր սխալների մասին, որից հետո կնայենք: Դա ժողովրդի խնդիրն է: Ժողովուրդը պետք է ների մարդկանց կատարած քայլերի համար:
- Իսկ ընդդիմության միավորումը այս փուլում` նախագահական ընտրություններին ընդառաջ հնարավոր համարո?ւմ եք: Նաեւ` այժմ ԱԺ-ում կա? համագործակցություն ՀԱԿ-ի եւ ՀՅԴ-ի հետ:
- Նորմալ համագործակցություն եւ հարաբերություն կա: Մենք համագործակցում ենք ոչ թե անհատների հետ, այլ գաղափարների եւ ծրագրերի շուրջ: Եթե գաղափարները բխում են մեր երկուստեք շահից, մենք համագործակցում ենք: Տեսաք, որ երեք ընդդիմադիր ֆրակցիաներն էլ միահամուռ հանդես կառավարության ծրագրի դեմ քննադատություններով եւ միասին քվեարկեցին այդ ծրագրի դեմ: Նույնը եղավ Սեւանա լճի հարցի քննարկումների հետ կապված:
- Պարոն Արզումանյան, Մարտի 1-ից մոտ հինգ տարի է անցել, ըստ Ձեզ, արվել են քայլեր նոր «Մարտի 1»-երը կանխելու համար:
- Ոչ: Դրա կարեւարգույն նախապայմանը մարտի 1-ի անմեղ զոհերի բացահայտումն է: Քանի դեռ մարտի 1-ի հարցով գործի բացահայտման եւ մարդասպաններին պատասխանատվության ենթարկելու հարցում չկա որեւէ առաջխաղացում, ապա որեւէ երաշխիք չկա, որ դա չի կրկնվի:
- Որպես նախկին ԱԳ նախարար ինչպե?ս եք Ձեզ զգում նոր ԱԺ-ում:
Նաեւ հայտնի է, որ ԱԺ արտաքին հարցերի հանձնաժողովի փոխնախագահ եք ընտրվել: Ձեր ներկայությունն այնտեղ ինչ-որ բան կփոխի?:
- Այնքանով, որքանով յուրաքանչյուր ընդդիմադիր գործչի ներկայությունը ԱԺ-ում կամ ԱԺ որեւէ հանձնաժողովում հնարավորություն է տալիս հնչեցնել ընդդիմադիր տեսակետ: Տեսակետ, որը չի համընկնում իշխող կուսկացության տեսակետի հետ, պայքարել այդ տեսակետի համար, փորձել համոզել մյուսներին, փորձել համախոհներ գտնել: Սա նորմալ աշխատանք է: ԱԺ-ում կա երեք հստակ ընդդիմադիր խմբակցություն, եւ գոնե մեր մասով փորձելու ենք իրականացնել այն ծրագրերը, որ ներկայացրել ենք ընտրողի դատին:
- Ըստ նախագահականի հաղորդագրության` ԵՄ-ն ողջունել է խորհրդարանական ընտրությունները, հայտարարել է, թե ամենադրական ընտրություններն էին: Սա նշանակո?ւմ է, որ Արեւմուտքը ՀՀ իշխանություններին ավելի շատ շանսեր է տալիս:
- Նույն ԵՄ-ն դեռեւս անցյալ տարվա դեկտեմբերին որոշում էր կայացրել, որ խորհրդարանական ընտրությունների արդյունքներից ելնելով կհրավիրեն միջազգային դոնորների կոնֆերանս` Հայաստանին ֆինանսական օժանդակություն տրամադրելու համար: Ինչպես գիտեք, երեկ որոշում է կայացվել, որ այդ որոշումը կկայացվի նախագահական ընտրություններից հետո: Սա գալիս է հակասելու ձեր գնահատականին, որովհետեւ դրանով հստակ պատգամ է ուղարկվում ՀՀ կառավարությանը, որ այսինքն ԵՄ-ն այնքան էլ գոհունակություն չի հայտնում, դժգոհ է ընտրությունների արդյունքներից, եւ տալիս է եւս մեկ հնարավորություն, որ մինչեւ նախագահական ընտրությունները շտկումներ մտցվեն: Հայաստանի հասարակությունը պետք է ընդունի կամ չընդունի ընտրությունների արդյունքները: Մենք գտնում ենք, որ մեր հասարակության ընտրությունը չի արտացոլվել ընտրություններում:
Զրուցեց Մարինե Խառատյանը
