«Հանթսման»-ի նոր սեփականատեր. «Մեզ չվերաբերող հարց է»
«Մենք փող չենք լվանում»,- պնդում է «Շեն կոնցեռնի» սեփականատեր Սամվել Բեգլարյանը, ով մոտ երկու տարի առաջ ձեռք է բերել «Հանթսման Բիլդինգ Փրոդաքթս» ընկերությունը :
Ինչպես հայտնի է' ԱԳ նախկին նախարար Վարդան Օսկանյանի «Սիվիլիթաս» հիմնադրամի դեմ հարուցված փողերի լվացման գործի հիմքում «Հանթսման Բիլդինգ Փրոդաքթս» ընկերության վաճառքի գործարքն է: Վարդան Օսկանյանն արդեն հայտարարել է, որ քրգործի հարուցումը քաղաքական պատվեր է իր գործունեության դեմ :
«Հանթսման Բիլդինգ Փրոդաքթս» ընկերությունը դադարել է Հայաստանում գործել դեռ 2009 թվականին եւ 2010-ին Տնտեսական մրցակցության պետական հանձնաժողովի համապատասխան թույտվությամբ վաճառվել է գործարար Սամվել Բեգլարյանին պատկանող « Շեն կոնցեռն» ընկերությանը:
«Հանթսման» ընկերությունը և Սամվել Բեգլարյանը 2010 թվականի նոյեմբերի 29-ին դիմել են հանձնաժողով' հայտնելով, որ «Հանթսման» ընկերության միակ մասնակից Տիգրան Կարապետյանը նախատեսում է իրեն պատկանող 100 տոկոս բաժնեմասը վաճառել Սամվել Բեգլարյանին: Սամվել Բեգլարյանի 2010 թվականի դեկտեմբերի 27-ի գրությամբ նշվել է, որ գործարքի նպատակն է հանդիսանում Վերակառուցման և Զարգացման Եվրոպական Բանկի հետ համատեղ շուրջ 20 միլիոն եվրո ներդրմամբ և «Հանթսման» ընկերության անշարժ գույքի և արտադրական տարածքի օգտագործմամբ գիպսակարտոնի արտադրության կազմակերպումը:
« Ա1+» -ը զրուցեց «Շեն կոնցեռնի » սեփականատեր Սամվել Բեգլարյանի հետ:
- Պարոն Բեգլարյան, հայտնի է, որ Դուք եք ձեռք բերել «Հանթսման բիլդինգ պրոդաքթս» -ը: Այժմ այդ ընկերության վաճառի հետ կապված քրեական գործ է հարուցվել եւ ասվում է, որ 2 մլն դոլարանոց գործարքից հարկեր չեն մուծվել: Ո՞րն է Ձեր մեկնաբանությունն այդ առթիվ:
- Ինչ ձեւով որ վաճառքը ֆիքսած է, մենք հենց էտ գնով էլ ձեռք ենք բերել, թե դրանից հետո ինչ խնդիր է եղել կամ ով ում է վաճառել, ճիշտն ասած, մենք էդքան տեղյակ չենք: Մեր մոտ հարկայինի ստուգումների արդյունքում ամեն ինչ պարզ ու մաքուր է եղել: Մեր հետ կապված ընդհանրապես խնդիր չի եղել:
- Իսկ Դուք այս գործով հրավիրվե՞լ եք ԱԱԾ' ցուցմունք տալու որպես վկա:
- Չէ: Մեր մոտ ուղղակի հարկային թղթաբանությունն են ստուգել, բանկային փոխանցումները, ամեն ինչը համապատասխանում են: ԱԱԾ-ի հետ կապված ինչ-որ խնդիր կամ ինչ- որ մի բան բացարձակապես չի եղել: Եթե ինչ -որ մեկը մի բան վաճառում է 1000 դրամով եւ դուք օրինական առնում եք, հարկային թղթաբանական մեջ ֆիքսում եք, որ դա առել եք 1000 դրամով: Հետո, թե այդ վաճառողի հետ կապված խնդիր կլինի կամ չի լինի, դա ի՞նչ կապ ունի ձեր հետ: Կոնկրետ «Շեն կոնցեռն» է գնորդը եւ էտ հարցը գնորդի հետ ոչ մի կապ չունի: Իսկ թե վաճառողը հետագայում ինչ խնդիր ա ունեցել, մենք տեղյակ էլ չենք անգամ: Որքան գնով վաճառել են, մենք կոնկրետ էդքան գումար փոխանցել ենք իրենց հաշվին:
- Այսինքն' տեղյակ չե՞ք եղել, որ այդ փողերը լվացվելու էին, ինչպես ԱԱԾ-ն է պնդում:
- Մենք ոչ փող ենք լվանում, ոչ էլ ինչ որ մեկին ինչ- որ հանցագործության մեջ օգուտ ենք տալիս: Եթե փողերի լվացման հարց է, «Շեն կոնցեռնը» բացարձակ կապ չունի: Եթե մեկը ինչ որ մի բան վաճառում է, դուք առնում եք, հետո ձեզ հետաքրքի՞ր է՝ այդ փողը լվանում են, թե չէ: Ես ընդհանրապես չգիտեմ' փող լվանալը տվյալ պարագայում ոնց ա լինում, եթե մարդն իր ունեցած ապրանքը վաճառում է: Էստեղ փող լվանալու ինչ- որ հարց չեմ տեսնում:
- Այսինքն' ըստ ձեզ, իրատեսական չէ՞ ԱԱԾ-ի ներկայացրած մեղադրանքը:
- Ես չեմ կարող կարծիք հայտնել, ԱԱԾ-ի կայացրած որոշմանը կողմ լինել կամ դեմ, որովհետեւ անգամ տեղյակ չեմ, ԶԼՄ-ներից եմ տեղյակ: Անձամբ ԱԱԾ-ի որեւէ ներկայացուցչի հետ ոչ զրուցել եմ, ոչ էլ ինձ մեղադրանք են առաջադրել: Գնորդի հետ դա կապ չունի: Իսկ թե վաճառողն էտ գումարը լվացել ա, կամ կերել ա կամ ուրիշ բիզնեսի մեջ ա դրել, թե բարեգործությամբ է զբաղվել, այդ արդեն, ճիշտն ասած, ես չեմ կարող որոշել կամ իմանալ, չի էլ հետաքրքրում ինձ:
- Պնդո՞ւմ եք, որ «Շեն կոնցեռնը» փողերի լվացման հետ կապ չունի:
- Բացարձակ:
- Եթե հրավիրեն ԱԱԾ, կգնա՞ք:
- Բնականաբար, եթե հրավիրեն ԱԱԾ, ես եւ ՀՀ յուրաքանչյւոր քաղաքացի էլ պարտավոր ենք գնալ: Նույն բանն ենք էնտեղ ասելու:
- Իսկ կարելի է իմանալ' ի՞նչ նպատակով եք գնել «Հանթսման» ընկերությունը:
- Բիզնեսային նպատակով:
- ԱԳ նախկին նախարար Վարդան Օսկանյանն արդեն հայտարարել է, որ այս գործը քաղաքական պատվեր է: Ո՞րն է Ձեր կարծիքը, Ձեր գնահատականն այդ առթիվ:
- Ես քաղաքականությամբ ոչ զբաղվում եմ, ոչ էլ տեղյակ եմ՝ Օսկանյանն ինչ է ասել: Եթե քաղաքական պատվեր է կամ իսկապես չգիտեմ ինչ-որ մի բան է, դա մեզ չհետաքրքրող ու չվերաբերող հարց է:
Զրուցեց Մարինե Խառատյանը
