Ֆրանսիայի կառավարությունը բոյկոտեց Եվրո-2012-ը
Ուկրաինայի նախկին վարչապետ Յուլյա Տիմոշենկոյի շուրջ ստեղծված իրավիճակի պատճառով Ֆրանսիայի կառավարությունը որոշեց բոյկոտել ֆուտբոլի Եվրոպայի առաջնության այն խաղերը, որոնք անցկացվելու են Ուկրաինայում:
«Կառավարության ոչ մի ներկայացուցիչ չի այցելի Ուկրաինա՝ ֆուտբոլային խաղ դիտելու համար: Արտաքին գործերի նախարարությունն այդ մասին արդեն տեղեկացրել է ուկրաինական կառավարությանը» - հայտարարել է Ֆրանսիայի սպորտի, երիտասարդության հարցերի եւ կրթության նախարար Վալերի Ֆուրնեյրոնը:
Մինչ այդ Ֆրանսիայի նորընտիր նախագահ Ֆրանսուա Օլանդը ասել էր, որ ինքը շատ է սիրում ֆուտբոլ, բայց այն, ինչ տեղի է ունենում Ուկրաինայի քաղաքական կյանքում, լուրջ խնդիր է:
Ի դեպ, Ֆրանսիայի հավաքականը հանդես է գալու Կիեւում եւ Դոնեցկում, ուստի երկրի ղեկավար այրերը իրենց սիրել թիմի խաղերը ստիպված կլինեն դիտել միմիայն հեռուստացույցով:
