Սերժ Սարգսյանի «ներդրածը» չի, ծնողների ներդրածն է
Պատգամավոր Գրիգոր Մարգարյանը ԿԸՀ-ից պատգամավորի մանդատ ստացավ երրորդ անգամ : Նա այն բացառիկ պատգամավորներից է, որ հասցրել է լինել խորհրդարանական մի շարք խմբակցություններում: Գործարար Գրիգորի Մարգարյանը ժամանակին պատգամավոր է դարձել որպես ՕԵԿ-ական, հետո, երբ ՕԵԿ-ն ընդդիմություն դարձավ, Գրիգոր Մարգարյանը լքեց կուսակցությունը եւ տեղափոխվեց գործարար պատգամավորական խումբ :
Նախորդ խորհրդարանում նա արդեն Հանրապետական խմբակցության անդամ էր, սակայն այս ընտրություններում ՀՀԿ-ն նրան չառաջադրեց, եւ նա մեծամասնականով առաջադրվեց ԲՀԿ-ի կողմից: Զրուցեցինք նրա հետ :
- Պարոն Մարգարյան, Դուք ԱԺ տարբեր խմբակցություններում եք եղել, հիմա նոր խմբակցություն եք գնում : Ի ՞նչ սպասումներ ունեք ԲՀԿ-ի հետ աշխատանքից:
- Ես ինը տարի է պատգամավոր եմ : Այն սպասումները, որ ունեի, իրականացել են եւ կշարունակեմ աշխատել նույն հունով : Ի ՞նչ սպասում եք դուք ակնկալում : Ես եղել եմ ՕԵԿ անդամ 2003-2006 թվականը, դրանից հետո անկուսակցական եմ մինչեւ այսօր :
- Չնայած դուք ԲՀԿ-ի կողմից եք թեկնածու առաջադրվել, ընտրարշավի ժամանակ Սերժ Սարգսյանը կոչ արեց ձայն տալ Ձեզ եւ ասվում էր, թե Դուք Սերժ Սարգսյանի մարդն եք ԲՀԿ-ում, իր ներդրածն եք:
- Ես ներդրածն եմ իմ ծնողների, ինչպես բոլոր նորմալ մարդիկ եւ եթե երկրի նախագահը, որը ղեկավարում է հանրապետական կուսակցությունը, հայտարարում է, որ պաշտպանում է իր կոալիցիոն գործընկերոջ առաջադրած պատգամավորին, ես ինձ շատ լավ եմ զգում եւ ուրախ եմ զգում դրանից: Ասենք' ոչ մի վատ բան չկա, որ մարդ իր կոալիցիոն գործընկերոջ մեծամասնական պատգամավորին պաշտպանում է : Շատ ուրախ եմ եւ շատ հպարտ եմ :
- Սակայն փաստորեն հանրապետականը չցանկացավ Ձեր թեկնածությունն առաջադրել, եւ Դուք դրա համար գնացիք ԲՀԿ :
- Ես դրա համար չեմ գնացել: Դա եղել է քաղաքական որոշում : Ես անկուսակցական եմ, ինձ առաջադրել է ԲՀԿ-ն պարզապես: Էդքանը : Ոչ մի վատ բան չեմ տեսնում : Շատ ուրախ եմ նաեւ, որ ԲՀԿ-ն էլ է ինձ պաշտպանել :
- Ասել է թե' համաձայնեցրե՞լ էիք ԲՀԿ գնալը:
- Ես չեմ համաձայնեցրել : Պարզապես ինձ առաջարկել են: ԲՀԿ-ի կողմից առաջարկություն է եղել, որ իրենք ինձ առաջադրեն: Նորմալ եմ մոտենում դրան՝ հաշվի առնելով, որ Ծառուկյան Գագիկի հետ մենք ընկերություն ենք անում 1990 թվականից :
- Սակայն մյուս կողմից ասվում էր, գործարարները չեն լինելու ԱԺ-ում... :
- Ձեր ինֆորմացիան թերի է : Ասվել է, որ համամասնական կարգով, ցուցակների մեջ չեն լինելու : Ինչ վերաբերում է մեծամասնականին, օրենքը որ բացեք, էնտեղ սեւով սպիտակին գրած է, որ 25 տարին լրացած ՀՀ բոլոր քաղաքացիները իրավունք ունեն ընտրվել որպես պատգամավոր :
- Պարոն Մարգարյան, փաստորեն Դուք գնացիք ՕԵԿ' ՕԵԿ-ն այն ժամանակ դարձավ ընդդիմություն, հիմա էլ ԲՀԿ-ն կոալիցիայից դուրս եկավ, դարձավ այսպես ասած՝ կառուցողական ընդդիմություն :
- «Բարգավաճ Հայաստան» կուսակցությունը չի հայտարարել, որ ինքը ընդդիմություն է գնում: Այլընտրանքային ֆրակցիա է լինելու:
- Իսկ Դուք անձամբ ինչպե՞ս եք գնահատում ԲՀԿ-ի' կոալիցիա չմտնելու որոշումը :
- Շատ նորմալ : Կուսաացությունն ունի ղեկավարը' Գագիկ Ծառուկյանը եւ իր որոշումների կոմենտարիան ես չեմ կարծում, որ ճիշտ է տալ :
- Հնարավո ՞ր է անդամագրվեք ԲՀԿ-ին առաջիկայում:
- Չգիտեմ դեռ : Կարծում եմ' ոչ : Որովհետեւ ես մի անգամ պատիվ եմ ունեցել կուսակցություն մտնելու եւ դրանից հետո որոշումս վերջնական է, որ էլ կուսակցության անդամ չեմ լինելու:
Զրուցեց Մարինե Խառատյանը
