«ՀՀԿ-ն ու ԲՀԿ-ն գողոնն են կիսում» (տեսանյութ)
ՀԱԿ-ի շուրջօրյա հանրահավաքները դադարեցնելուց մոտ 10 օր հետո ՀԱԿ ներկայացուցիչ Նիկոլ Փաշինյանը վստահեցնում է, որ միանգամայն ճիշտ որոշում է կայացվել: «Ա1+»-ի հետ զրույցում Նիկոլ Փաշինյանը հիմնավորեց իր տեսակետը, ինչպես նաեւ անդրադարձավ հոկտեմբերի 28-ին նախատեսված հանրահավաքին ու պատասխանեց մեր հարցերին:
-Հասկանալու համար, թե ի՞նչ տեղի ունեցավ, պետք է ճիշտ ընկալել իրավիճակը: Մեծ հաշվով, մենք դուրս ենք եկել քաղաքացիների հետ շփման եւ այդ շփումների արդյունքում համոզվել ենք, որ երկրում կա իշխանափոխության պահանջ: Մենք շուրջօրյա հանրահավաքներով քաղաքացիներին առաջարկել ենք իշխանափոխության կոնկրետ տարբերակ՝ քաղաքացիները հավաքվում են Ազատության հրապարակում եւ կայացնում են իշխանափոխության որոշում:
Մեկ շաբաթվա գործողությունների արդյունքում քաղաքացիների ժողովը մեծ հաշվով չապահովեց այն քվորումը, որը կարող էր լեգիտիմ իշխանափոխության որոշում կայացներ: Մեզ համար խնդիր էր դրված՝ կամ սպասել այդ քաղաքացիներին, կամ էլ հրապարակից նորից գնալ այդ քաղաքացիների մոտ եւ եթե այդ քաղաքացիներն ընկճված են, նրանց հույս տալ, եթե վախեցած են, նրանց համարձակություն հաղորդել, եթե կոտրված են նեցուկ լինել: Դա էր պատճառը, որ շուրջօրյա հանրահավաքները դադարեցվեցին։
-Դուք ընտրեցիք երկրորդ տարբերակը: Հիմա ինչո՞վ եք զբաղված, շարունակո՞ւմ եք շփվել քաղաքացիների հետ:
-Այո: Ես գրեթե ամեն օր հանդիպում եմ քաղաքացիների հետ: Այսօր մեր խնդիրը քաղաքացիների հետ շփվելն է, եւ այդ միջոցով ավելի բարձր մակարդակի հասցնել իշխանափոխության պահանջը: Առաջիկայում աչքի առաջ կունենանք քաղաքացիների մի այնպիսի ժողով, որն ի վիճակի կլինի կայացնել իշխանափոխության որոշում: Ես այս մասին հատուկ եմ շեշտում, որովհետեւ կան մարդիկ, որոնք ասում են, որ կա իշխանափոխության տարբերակ, որը կարելի է իրականացնել 5 000, 10 000 հոգով: Իշխանափոխության այդպիսի տարբերակները մեզ համար ընդունելի չէ:
-Ինչո՞ւ:
-Որովհետեւ հարց է ծագելու՝ այդ իշխանափոխություն անող մարդիկ ո՞ւմ անունից են խոսելու: Մեզ համար շատ կարեւոր է գործել ժողովրդի անունից եւ լիազորված լինել ժողովրդի կողմից: Հակառակ դեպքում, այդ իշխանափոխությունը չի լինի հանուն ժողովրդի, հանուն Հայաստանի եւ ժողովուրդը պետք է իր անմիջական մասնակցությունն ունենա այդ գործընթացին: Մեր գործողությունների հիմքում պետք է լինի ժողովրդի որոշումը: Մենք գիտենք, որ ժողովուրդն իր մեջ ունի այդ որոշումը եւ խնդիրն այն է, որ ժողովուրդը գա Ազատության հրապարակ եւ այնտեղ ցուցադրի իր որոշումը:
-Իսկ եթե ժողովուրդը չգա Ազատության հրապարակ իր որոշումը ցուցադրելու, ի՞նչ եք անելու:
-Մենք մարդու հետ խոսելու ենք, մարդու մոտ գնալու ենք այնքան ժամանակ, մինչեւ ինքը իր ներքին բարոյահոգեբանական արգելքները հաղթահարի եւ գա Ազատության հրապարակ: ՀՀ քաղաքացու կայացրած ցանկացած որոշում մեզ համար ենթակա է իրականացման:
-Դուք ասում եք, որ այս անգամ հանրահավաքների ընթացքում Ազատության հրապարակում չապահովվեց համապատասխան քվորում, բայց 2008թ. շուրջօրյա հանրահավաքներում այդ քվորումը կար: Ի՞նչ երաշխիք, որ իշխանությունները այս անգամ պատրաստ են հաշվի առնել այդ քվորումը:
-Երաշխիքը հետեւյալն է՝ 2008թ. ես ինձանից կախված ամեն ինչ արել եմ, որ այդ որոշումը դառնա իրականություն: Շատ լավ է, որ այդ որոշումը կա եւ որեւէ մեկը չի կարող այդ հարցում կասկած հայտնել: Եթե 2008թ. իշխանափոխություն տեղի չի ունեցել, դա դեռ չի նշանակում, որ այն տեղի չի ունենա 2011թ.: Դրանից իշխանափոխության պահանջը չի դադարում օրախնդիր լինել ՀՀ-ում:
-Խոսքը ոչ թե պահանջի մասին է, այլ իշխանափոխություն իրականացնելու ձեւի: 2008թ-ի եւ այսօրվա իշխանությունները տարբե՞ր են, փոխվե՞լ են: Նրանք նույն կե՞րպ չեն պատասխանի ՀԱԿ-ի պահանջին:
-Ես կարծում եմ, որ փոխվել է ՀՀ քաղաքացին: Շուրջօրյա ակցիաները ցույց տվեցին, որ քաղաքացին փոխվել է եւ իր կամքով իշխանություններին կարողանում է պարտադրել որոշակի վարվելաձեւ: Դուք տեսաք, որ իշխանությունները ֆորմալ առումով հնչեցրեցին հայտարարություններ հանրահավաքի անօրինականության մասին, բայց բուն հանրահավաքի նկատմամբ գործողություններ չձեռնարկեցին: Սա 2008թ. կարեւոր դասերից մեկն էր, եւ հստակ ուղերձ էր ՀՀ քաղաքացիներին, որ հանրահավաքի մեջ այնքան էլ սարսափելի բան չկա: Խնդիր ունեցան այն քաղաքացիները, որոնք ոչ թե եկան Ազատության հրապարակ, այլ նրանք, ովքեր չեկան: Անկախ նրանից, թե ի՞նչ պատճառով տեղի չի ունենում իշխանափոխություն, այն դրանով առավել եւս դառնում է ավելի կենսական անհրաժեշտություն՝ ՀՀ-ի համար: ՀԱԿ-ը իր պայքարում հետեւողական է, որպեսզի ՀՀ-ում օր առաջ տեղի ունենա իշխանափոխություն:
-Իշխանությունները տարբեր առիթներով նշում են, որ Ազատության հրապարակում չհավաքվեց այնքան մարդ, որ իշխանափոխություն լիներ եւ դա նշանակում է, որ ՀՀ-ում չկա իշխանափոխության պահանջ: Եթե հոկտեմբերի 28-ին նախատեսված ՀԱԿ-ի հանրահավաքում ավելի քիչ մարդ լինի, կարե՞լի է ենթադրել, որ իշխանությունները ճիշտ են:
-Կներեք անհամեստության համար, բայց սեփական օրինակս բերեմ: Ես 2007թ. միայնակ եմ հանրահավաք արել եւ այն ժամանակ էլ էին ասում, որ չկա իշխանափոխության պահանջ, ժողովուրդը կոտրված է, հուսահատված է: Եթե նույնիսկ մարդկանց մեջ կան այդ զգացողությունները, դրանք հաղթահարելի են: Ես որպես քաղաքական գործիչ, հասարակական գործիչ, լրագրող, իմ պարտքն եմ համարում ամեն ինչ անել դրանք հաղթահարելու համար: Ես համոզված եմ, որ ՀՀ քաղաքացիների վճռորոշ մեծամասնությունը գալու է Ազատության հրապարակ եւ Սերժիկին ստիպելու է հավաքել իր իրերը եւ հեռանալ, իսկ թե որ ուղղությամբ, դա ժողովուրդը կորոշի:
-Սերժ Սարգսյանին այսօր ՀԱԿ-ը կարծես թե չի հետաքրքրում, նա խնդիրներ ունի ԲՀԿ-ի հետ: Ինչպե՞ս եք վերաբերում ՀՀԿ- ԲՀԿ հարաբերությունների վերաբերյալ մամուլում հրապարակված լուրերին, մասնավորապես՝ Գագիկ Ծառուկյանին մեկ շաբաթ ժամանակ տալուն:
-ՀՀ-ում հաստատված է ապօրինի, հանցագործ իշխանություն: Հանցագործ իշխանությունը միայն մեկ խնդիր կարող է ունենալ՝ գողոնը կիսելու խնդիր: Ես չեմ ցանկանում մեկնաբանել հանցագործների գողոնը կիսելու պրոցեսը: Ես կարծում եմ, որ ժողովուրդը խնդիր ունի՝ հանցագործների ձեռքից վերցնի, վերադարձնի իրենից գողացածը:
-Գողոն ասելով նկատի ունենք 2008թ. նախագահական ընտրությունների արդյունքնե՞րը:
-Ոչ միայն: Ես նկատի ունեմ, որ 1999 հոկտեմբերի 27-ի սպանդից հետո ՀՀ-ում հաստատված է ավազակապետություն եւ դրանից հետո հանցագործ իշխանությունը միշտ էլ զբաղված է եղել գողոնը կիսելով: Այն գործողությունը, որը նրանց համար կոչվում է «ընտրություններ» նույնպես գողոնը կիսելու հերթական առիթ է:
-Վերադառնանք ՀԱԿ-ին: Հաշվի առնելով, որ քիչ ժամանակ է մնացել մինչեւ հերթական ընտրությունները, դուք դեռ իրատեսակա՞ն եք համարում ՀՀ-ում արտահերթ ընտրություններ անցկացնելը:
-Այո: Մինչեւ 2012թ. մայիսի 14 ներառյալ, ՀՀ-ում կարող են տեղի ունենալ արտահերթ ընտրությունները: Ես, մենք, պայքարելու ենք, որպեսզի ՀՀ-ում տեղի ունենա արտահերթ ընտրություններ: Արտահերթ ընտրություններ անցկացնելու որոշումը մի քանի ժամվա խնդիր է: Երբ ՀՀ քաղաքացիների վճռորոշ մեծամասնությունը մեր կոչով կհավաքվի Ազատության հրապարակում, ես համոզված եմ, որ մենք մի քանի օրվա ընթացքում կունենանք արտահերթ նախագահի եւ խորհրդարանի ընտրությունների մասին որոշում:
-Իսկ վճռորոշ մեծամասնությունը, մոտավորապես քանի՞ մարդ է նշանակում:
-Ինձ համար՝ լեփ լեցուն Ազատության հրապարակ:
-Ձեր կարծիքով, հոկտեմբերի 28-ին Ազատության հրապարակում ավելի քիչ մարդ չի՞ լինի, քան շուրջօրյա հանրահավաքների ընթացքում:
-Ես համոզված եմ, որ հոկտեմբերի 28-ի հանրահավաքին ավելի շատ մարդ կլինի, որովհետեւ մտադիր եմ կրկնակի անգամ ավելի շատ ջանք գործադրել, քան կանխատեսում են հոռետեսները:
-Իսկ հոկտեմբերի 28-ին կարո՞ղ է շուրջօրյա հանրահավաքի սկիզբ դրվել:
-Դա կախված է քաղաքական իրավավիճակից:
-Կխնդրեի նաեւ ներկայացնել ի պաշտպանություն «Հայկական ժամանակ» օրաթերթի դրամահավաքի արդյունքները: Դատարանի որոշման համաձայն 3 օլիգարխների՝ Ռուբեն Հայրապետյանին, Սամվել Ալեքսանյանին եւ Լեւոն Սարգսյանին պետք է վճարեք 6 միլիոն 344 հազար դրամ:
-Հանգանակությունը շարունակվում է եւ 2 օրից այն կավարտվի, անհրաժեշտ գումարը կլինի:
-Ամբողջ գումա՞րն եք տալու:
-Այո, որ կեսը տանք օլիգարխները սովից կմեռնեն:
Հարցազրույցը վարեց Վիկտորյա Աբահամյանը
