Գ. Ջհանգիրյան. «Կամ մեկը արեք, կամ մյուսը»
Հարցազրույց ՀԱԿ անդամ, նախկին զինդատախազ Գագիկ Ջհանգիրյանի հետ:
-Պարոն Ջհանգիրյան, ուղիղ երկու օր է, ինչ պետական քարոզչությունը, հանրային հեռուստատեսությունը հայտարարում է, որ շուրջօրյա հանրահավաքներն ապօրինի են, եւ իրենք ցանկացած պահի կարող են դրանք դադարեցնել՝ ընդհուպ մասնակիցներին ցրելու միջոցով: Որպես իրավաբան Ձեր կարծիքն ինչպիսի՞ն է:
-Իհարկե, այս շուրջօրյա հանրահավաքները իրազեկված չեն, արտոնված չեն, բայց «Հավաքների մասին» 2011թվականի ապրիլին ընդունված ՀՀ օրենքի 32րդ հոդվածի 2-րդ մասին 2-րդ նախադասության հիման վրա, որը հիմնված է Սահմանադրության 29-րդ հոդվածի վրա, ոստիկանությունը պարտավոր է աջակցել խաղաղ հավաքներին: Հավաքը խաղաղ է, հասարակական կարգի որեւէ խախտում տեղի չի ունենում, ինչպես դուք ականատեսն ու վկան եք, նաեւ անհամաչափ չեն սահմանափակվում այլոց իրավունքներն ու ազատությունները: Ուստի այս նույն դրույթից ելնելով՝ ոստիկանություն իր պաշտոնական հաղորդագրության մեջ հայտարարել է, որ ոստիկանությունը աջակցելու է հանրահավաքին: Ի՞նչ է նշանակում աջակցել։ Դա առնվազն նշանակում է չխոչընդոտել, ուրեմն, եթե ոստիկանությունը պարտավոր է նույն «Հավաքների ազատության» մասին օրենքի համաձայն աջակցել հանրահավաքին, հետեւաբար նա չի կարող միաժամանակ հայտարարել, թե հավաքը ապօրինի է, արտոնված չէ եւ սպառնալ մասնակիցներին ինչ -որ պատասխանատվությամբ:
Կամ մեկը արեք, կամ մյուսը: Եթե դուք հայտարարել եք, որ աջակցելու եք հավաքին, դա նշանակում է՝ հավաքը օրինական է, չկա որեւէ հանրորեն վտանգավոր արարք, չկա այլոց իրավունքների անհամաչափ սահմանափակում: Ինչ վերաբերում է հրապարակում վրանների տեղադրման հարցին, թե դա հասարակական կարգի խախտում է, ես ցավում եմ, որ մեր ոստիկանության ղեկավարությունը հասարակական կարգի խախտումը չի տարբերում վրանների տեղադրումից հրապարակում: Այ, եթե վրանները տեղադրված լինեին բանուկ երթեւեկելի ճանապարհների վրա, ես համամիտ կլինեի։ Եթե վրանները տեղադրված լինեին հետիոտն անցումների վրա եւ խոչընդոտեին ժողովրդի երթեւեկը թեկուզ մայթերին, էլի կհամաձայնեի, որ դա հասարակական կարգի խախտում է, բայց պարզ վրանի տեղադրումը չի կարող հասարակական կարգի խախտում դիտարկվել։ Ավելին, այս նույն հրապարակում իշխանությունների թույլտվությամբ հազար ու մի առեւտրական տաղավարներ են տեղադրվել՝ մատնիք, մարջան, ապարանջան են վաճառել, բա ո՞ւր էր այդ ժամանակ ոստիկանությունը, ինչո՞ւ չէր հայտարարում, թե դուք խախտում եք հասարակական կարգը:
-Հիմա, եթե մի այդպիսի որոշում կայացվի եւ որոշվի այս հրապարակում մատնիք, մարջան, ապարանջան վաճառելու տաղավարներ բացել, դուք կազատե՞ք հրապարակը:
-Մենք որեւէ հանրորեն վտանգավոր արարք չենք կատարում եւ հանրահավաքի մասնակիցները որեւէ իրավունքների եւ ազատությունների սահմանափակում չեն կատարում։ Ընդհակառակը, իշխանություններն են ամեն գնով խոչընդոտում հանրահավաքի բնականոն ընթացքին այն դեպքում, երբ իրենք իսկ հայտարարել են, որ աջակցում են հանրահավաքին։ Փակել են արտաքնոցները, շրջակա բոլոր սպասարկման կետերի աշխատանքը դադարեցվել է, ամբողջ հանրապետությունում հասարակական տրանսպորտի, տաքսիների երթեւեկությունն արգելված է, քաղաք մտնելուց բոլորին ստուգում են, հետ են վերադարձնում: Մենք այսօր պատրաստել ենք հայցադիմում եւ վաղն առավոտյան մուտք կանենք վարչական դատարան, որով բողոքարկելու ենք ոստիկանական գործողությունները, որովհետեւ իրենց գործողությունները հակասում են իրենց իսկ վկայակոչած հավաքների ազատության մասին օրենքի դրույթներին:
-Արդյո՞ք մարդու իրավունքի խոչընդոտում չի հարակից սրճարանների, կամ տարատեսակ սպասարկման կետերի գործունեության դադարեցումը:
-Իհարկե, խոչընդոտում է, եւ խայտառակ խոչընդոտում։ Այսօր ոստիկանությունը երկակի իրավիճակում է, նախ չի կարողանում արձանագրել որեւէ հասարակական կարգի խախտում, իրավունքների սահմանափակում հանրահավաքի մասնակիցների կողմից, որովհետեւ այդպիսիք չկան, եւ երկրորդ, ինքն ուզում է իր համար ինչ-որ հիմքեր ստեղծել, որ եթե հանկարծ ինչ-որ պահի այդպիսի որոշում կայացվի, ինքն ասի, ես իրավական հիմքեր եմ ունեցել հանրահավաքը դադարեցնելու, դադարեցրել եմ: Այդպիսիք չկան, այդպիսի հիմքեր գոյություն չունեն: ՀՀ Սահմանադրության 29-րդ հոդվածը , որի վերապահումները սահմանված են մայր օրենքի 43-րդ հոդվածով, այդ վերապահումները այս հանրահավաքում չկան: Չկան նաեւ նույն՝ «Հավաքների ազատության մասին» օրենքով սահմանված սահմանափակումները. հետեւաբար այս հանրահավաքը օրինական է:
-2008-ի մարտի 1-ին էլ օրինական չէ՞ր:
-Մենք «Հավաքների ազատության մասին» օրենքը շատ լուրջ քննադատության ենք ենթարկել 2011 թվականի ապրիլին: ՀԱԿ պետաիրավական հանձնաժողովը մեծ վերլուծականով անդրադարձել է օրենքի բազմաթիվ թերություններին, բացթողումներին, հասկացություններին, բայց նույնիսկ այս օրենքը ստիպված է եղել ամրագրել, որ խաղաղ հանրահավաքները ոստիկանությունը իրավունք չունի դադարեցնել եւ ցրել: Հենց այդ դրույթի ուժով այս հանրահավաքը օրինական է:
-Իսկ որքանո՞վ է պաշտպանված հանրահավաքների մասնակիցների անվտանգությունը եւ որքանով եք պաշտպանված սադրանքներից:
-Բնական է, որ մեր հավաքի կազմակերպիչը, նաեւ հավաքի հասարակական կարգի պահպանման կարգադրիչները անում են ամեն ինչ՝ սադրանքներից հեռու մնալու, հարբած մարդկանց հավաքի վայրից հեռացնելու , կոնֆլիկտային իրավիճակները բացառելու համար, բայց բնական է, որ օպերատիվ ծառայությունները մեծ հնարավորություն ունեն տարբեր տեսակի սադրանքների եւ այլ պրովոկացիաների, դրանից ոչ ոք պաշտպանված չէ, եւ բայց մենք անում ենք մեր ուժերի չափով, որպեսզի խուսափենք նման իրավիճակներից, մնացածը իշխանությունների խղճի ու բարոյականության վրա է:
Զրուցեց Դիանա Մարկոսյանը
