Բացել լրահոսը Փակել լրահոսը
A A
Տեսանյութեր Քաղաքականություն

Ռոբերտ Քոչարյանը ռուսական «շպիոնի» կարգավիճակում հայտնված անձ է․ Ալեն Սիմոնյան. ՈՒՂԻՂ (տեսանյութ)

Ազգային ժողովի նախագահ Ալեն Սիմոնյանը հայտարարել է, որ եթե անգամ այս ուրբաթ Հայաստանում անցկացվեն ընտրություններ, «Քաղաքացիական պայմանագիր» կուսակցությունը կհաղթի՝ հավաքելով 50+1 տոկոս ձայներ։ Սիմոնյանը հիշեցրել է, որ 2021-ի ընտրությունները օրինական են եղել, և ներկայիս իշխանությունն ունի ժողովրդի վստահությունը։

Խոսելով ընդդիմության՝ վարչապետի իմպիչմենտի նախաձեռնության մասին՝ ԱԺ նախագահը շեշտել է, որ գործող իշխանությունն այսօր էլ ամենամեծ աջակցությունն ունի։ Նրա խոսքով՝ անգամ 2026-ին ՔՊ-ն կարող է առավել մեծ թվով ձայներ ստանալ։

Անդրադառնալով երկրորդ նախագահ Ռոբերտ Քոչարյանին՝ Սիմոնյանը նրան մեղադրել է ռուսական շահերին ծառայելու մեջ.

«Ես կարծում եմ, որ Ռոբերտ Քոչարյանը ռուսական շպիոնի կարգավիճակ ունեցող մարդ է Հայաստանի Հանրապետությունում: Նա ռուսական շահերը հետապնդող և միայն այդ ուղղությամբ ծառայություն մատուցող քաղաքական գործիչ է»,– հայտարարել է Սիմոնյանը:

Նա ընդգծել է, որ սա իր քաղաքական գնահատականն է, և ինքը՝ որպես քաղաքական գործիչ, հայտարարելու ազատություն ունի։ Սիմոնյանը նշել է, որ Քոչարյանի խմբակցության անդամների հայտարարությունները շատ հաճախ համընկնում են ռուսական կողմի տեսակետների հետ։ Օրինակ, Գյումրիի քաղաքապետը, որն ըստ Սիմոնյանի սատարում է Քոչարյանին, հրապարակավ արտահայտվել է այն տեսակետի օգտին, թե Հայաստանը պետք է միանա Ռուսաստան–Բելառուս միութենական կազմին։

Խաղաղության պայմանագրի շուրջ քննարկումները շարունակվում են

Սիմոնյանը հայտնել է, որ Հայաստանի և Ադրբեջանի միջև խաղաղության համաձայնագրի ստորագրման շուրջ քննարկումները շարունակվում են, սակայն նա չի մանրամասնել՝ ընդգծելով, որ գործընթացը նուրբ է։ Նա հավելել է, որ Ադրբեջանը շարունակում է նոր նախապայմաններ առաջ քաշել, այդ թվում՝ պահանջելով, որ Հայաստանը փոխի Սահմանադրությունը և ԵԱՀԿ Մինսկի խումբը լուծարվի։

Հայկական կողմը պնդում է, որ Սահմանադրության մեջ չկա որևէ տարածքային պահանջ Ադրբեջանի նկատմամբ, և փաստաթղթի փոփոխությունը Հայաստանի ներքին գործն է։

Մեկնաբանություն Նոր Նորքում տեղի ունեցած միջադեպի մասին

ԱԺ նախագահը անդրադարձել է ապրիլի 29-ին Նոր Նորքի վարչական շրջանի շենքում տեղի ունեցած միջադեպին՝ նշելով, որ պետական պաշտոնյան պետք է զսպվածություն դրսևորի նույնիսկ սադրանքի պայմաններում։ Նրա խոսքով՝ խոսքի ազատությունը չպետք է վերածվի լկտիության։

Քննչական կոմիտեն հարուցել է քրեական վարույթ վեց անձի նկատմամբ։ Նրանց թվում են վարչական շրջանի ղեկավար Տիգրան Տեր-Մարգարյանը, ակտիվիստ Արթուր Չախոյանը և ավագանու անդամ Մեսրոպ Մանուկյանը։ Տարբեր մեղադրանքներով նրանց նկատմամբ կիրառվել է բացակայելու արգելք։ Տեր-Մարգարյանը «Հանրապետություն» կուսակցության անդամ է։