Զարուհի Փոստանջյանն ահազանգում է․ կրկին հարձակվել են նրա հայրական տան վրա (տեսանյութ)

«Երկիր Ծիրանի» կուսակցությունը հայտարարություն է տարածել․ 

Այսօր՝ 2025 թվականի ապրիլի 2-ին, կրկին ահաբեկչական հարձակում է տեղի ունեցել Երևան քաղաքի Արաբկիր վարչական շրջանի Վրացական 2 հասցեում գտնվող տան վրա։ Հանցագործները ներխուժել են տան տարածք, կոտրել ապակիները, միջսենյակային դուռը, կահույքը և այլ ավերածություններ կատարել։​

Հիշեցնենք, որ նշված տունը պատկանում է Երևանի ավագանու «Մայր Հայաստան» խմբակցության անդամ, փաստաբան Զարուհի Փոստանջյանի հայրական տունն է։​

Վերոնշյալ տարածքում և փողոցում առկա են տեսախցիկներ, մինչդեռ ոստիկանությունը ոչ միայն չի բացահայտել ընդամենը մի քանի օր առաջ տեղի ունեցած ահաբեկչությունը, այլև իր անտարբերության և անգործության հետևանքով հիմնավոր կասկածներ է առաջացնում առ այն, որ հենց ոստիկանությունն էլ կոծկում է հանցագործությունը կատարողներին և կազմակերպիչներին։​

Այս իրադարձությունները վկայում են այն մասին, որ Երևանում գործում է ահաբեկչական խմբավորություն, որը թափանցում է քաղաքացիների տները և կատարում ավերածություններ՝ վստահ լինելով իրենց անպատժելիության մեջ։​

«Երկիր Ծիրանի» կուսակցությունը պահանջում է անհապաղ բացահայտել այս հարձակումները և պատասխանատվության ենթարկել բոլոր մեղավորներին։