Բողոքող առևտրականները տոպրակներով շորեր են բերել կառավարության մոտ․ ակցիան՝ ֆոտոշարքով

Լուսանկարները՝ ՖՈՏՈԼՈՒՐԻ

Կառավարության շենքի դիմաց շրջանառության հարկի փոփոխություններից դժգոհ տնտեսվարողները շարունակում են բողոքի ակցիաները։ Այսօր ակցիայի մասնակից առևտրականները տոպրակներով հագուստ են բերել կառավարության մոտ՝ պահանջելով պաշտոնական ներկայացուցչից հաշվարկել ապրանքի ինքնարժեքը։

«Թող իրենք որոշեն էս ապրանքի ինքնարժեքը, ես վաճառքի գինն իրենց կասեմ։ Էդ ինքնարժեքը թող տան ինձ, ես էլ 10 տոկոս հարկը կտամ։ Վաճառքի գինը 150 հազար դրամ է, հարկը՝ 15 հազար։ Ես պատրաստ եմ 80 հազարով վաճառել ու 15 հազարն էլ հարկ տալ», – ասաց բողոքի ակցիայի մասնակիցներից մեկը՝ կոչ անելով կառավարության ներկայացուցիչներին իջնել և տեղում կատարել ապրանքի հաշվարկը։

Հիշեցնենք, որ հունվարի 1-ից ուժի մեջ մտած հարկային օրենսդրության փոփոխությունները զգալիորեն մեծացրել են շրջանառության հարկի բեռը, ինչը, տնտեսվարողների խոսքով, խոչընդոտում է իրենց գործունեությունը և սպառնում փոքր ու միջին բիզնեսի շարունակականությանը։

📍 Ակցիայի մասնակիցները պահանջում են հանդիպում կառավարության ներկայացուցիչների հետ՝ իրենց մտահոգություններին լուծում տալու համար։