«Մեկ շաբաթ ֆեդերացիայում»՝ արցախցի երեխաների համար
Մեկ շաբաթ անընդմեջ՝ 2-3 ժամ խաղեր, դասեր, արշավներ, ճանաչողական այցեր Երևանում, մագլցումներ և այլ միջոցառումներ՝ նախատեսված Արցախից բռնի տեղահանված 8-14 տարեկան երեխաների համար:
Ալպինիզմի և լեռնային տուրիզմի հայկական ֆեդերացիան մի քանի օրից կմեկնարկի «Մեկ շաբաթ ֆեդերացիայում» բարեգործական ծրագիրը։
Ֆեդերացիայի նախագահ Սուրեն Դանիելյանը հայտնեց, որ դեռևս ընթանում է մասնակիցների հավաքագրումը։
«Դիմել ենք Աշխատանքի և սոցիալական հարցերի նախարարություն՝ երեխաների հավաքագրման համար: Ծրագիրը իրականացնում ենք մեր միջոցներով․ որոշակի աջակցություն ստացանք անհատ մարդկանցից: Գումարը առաջին փուլում լրիվ բավարար է ծրագիրն իրականացնելու համար: Ծրագրի ընդլայնման դեպքում միգուցե դիմենք պետության օգնությանը»,-ասաց նա։
Կազմակերպիչների ակնկալիքները մեծ են: Բայց լեռնագնացություն՝ փոքրիկ գագաթների նվաճում, ծրագրում չկա:
«Փոքրերը միգուցե թույլ են, հյուծված են, առողջական, ֆիզիկական խնդիրներ ունեն», - նշեց Սուրեն Դանիելյանը:
Փոքրիկ մագլցումներ, այնուամենայնիվ, կլինեն Հայաստանի ֆիզիկական կուլտուրայի և սպորտի պետական ինստիտուտում՝ կրկին կախված երեխաների ֆիզիկական և հոգեկան վիճակից:
Ծրագրի հաջղության դեպքում՝ այն կարող է իրականացվել նաեւ մարզերում։
