Հայաստանի հավաքականը առաջադիմել է ՖԻՖԱ-ի դասակարգման նոր աղյուսակում

Ֆուտբոլի միջազգային ֆեդերացիան հրապարակել է ազգային հավաքականների դասակարգման նոր աղյուսակը:

ՖԻՖԱ-ի նոր հաշվարկով Հայաստանի հավաքականը 1252,6 միավորով գտնվում է 90-րդ տեղում: Անցած ամսվա համեմատ մեր ընտրանին առաջադիմել է 7 հորիզոնականով:

Հայաստանի հավաքականի նախորդ մրցակիցները՝ Ուելսն ու Լատվիան, մեզ պարտվելուց հետո նահանջել են և այժմ զբաղեցնում են համապատասխանաբար 35-րդ և 134-րդ տեղերը:

Մեր թիմի առաջիկա մրցակիցը՝ Թուրքիայի ընտրանին, երկու հաղթանակից հետո նույնպես առաջընթաց է գրանցել և այժմ գտնվում է 41-րդ հորիզոնականում:

Հայաստանի հավաքականի հաջորդ մրցակիցը՝ Խորվաթիան, չնայած Ազգերի լիգայի եզրափակիչում պարտվել է Իսպանիային, սակայն բարելավել է դիրքերն և այժմ զբաղեցնում է պատվավոր 6-րդ տեղը: Խորվաթները ետ են մնում Արգենտինայից, Ֆրանսիայից, Բրազիլիայից, Անգլիայից և Բելգիայից: