ՔՊ-ն չի գտնում, որ Մոսկվայի եռակողմ հանդիպումը տապալվել է (տեսանյութ)
Աջակցիր «Ա1+»-ինՄիջազգայնորեն ճանաչված Հայաստանի Հանրապետությունն առաջնորդվում է միջազգայնորեն ճանաչված իր 29.800 քկմ տարածքի սուվերենության պահպանմամբ եւ Լեռնային Ղարաբաղում ապրող հայ ժողովրդի իրավունքների եւ անվտանգության իրացմամբ, որը, մեր պատկերացմամբ, պետք է տեղի ունենա Բաքու-Ստեփանակերտ խոսակցության միջոցով, միջազգային երաշխավորության հովանու ներքո. այս մասին հայտարարել է ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանն ԱԺ հերթական նիստերին հաջորդող խորհրդարանական ճեպազրույցների ընթացքում:
Խմբակցության քարտուղարի խոսքով Ղարաբաղի հիմնախնդիրը խորացել է, երբ ՀՀ երկրորդ նախագահ Ռոբերտ Քոչարյանի կողմից Ղարաբաղը դուրս է թողնվել բանակցային սեղանից: Նա նշել է, որ այժմ իրենք փորձում են բանակցային սեղան եւ Բաքվի հետ երկխոսության վերադարձնել Արցախի ներկայացուցիչներին, որտեղ վերջիններս կկարողանան իրացնել իրենց իրավունքներն այնպես, ինչպես իրենք են պատկերացնում: «Արցախից հնչող ներքաղաքական հայտարարություններին ես չեմ արձագանքելու: Մենք մեր արցախցի գործընկերների հետ մշտական կապի մեջ ենք, նրանք տեղեկացված են բանակցային գործընթացի բոլոր մանրամասներին, տեղեկացված են եղել միշտ եւ տեղեկացված են լինելու միշտ»,- ասել է Արթուր Հովհաննիսյանը:
Լրագրողների հարցերը վերաբերել են երեկ Կրեմլում կայացած Հայաստանի վարչապետ Նիկոլ Փաշինյանի, Ռուսաստանի նախագահ Վլադիմիր Պուտինի եւ Ադրբեջանի նախագահ Իլհամ Ալիեւի հանդիպման մանրամասներին:
Լրագրողի այն հարցին` հնարավո՞ր է Զանգեզուրի միջանցքի հարցում Հայաստանը գնա զիջումների կամ Ռուսաստանը վերահսկի այդ ճանապարհը` խմբակցության քարտուղարն արձագանքել է. «Տեղին չեմ համարում հարցը, քանի որ ոչ մեկ անգամ ենք ասել, որ մեզ համար դա կարմիր գիծ է»: Նա հավելել է, որ Հայաստանի համար կարմիր գիծ է իր օրենսդրությունից դուրս որեւէ ճանապարհի տրամադրումը:
Տարածաշրջանում հաղորդակցության ուղիների ապաշրջափակման վերաբերյալ հարցին ի պատասխան` խմբակցության անդամ, ԱԺ պետական-իրավական հարցերի մշտական հանձնաժողովի նախագահ Վլադիմիր Վարդանյանը կարծիք է հայտնել, որ կոմունիկացիոն ապաշրջափակման մասով կողմերը մշտապես արտահայտել են դրական դիրքորոշում, գաղափարների շուրջ բոլորը համաձայնության են գալիս, բայց մանրամասների քննարկման արդյունքում կարող են ի հայտ գալ բազմաթիվ տեխնիկական խնդիրներ, որոնք առանձին լուծման կարիք են ունենում:
Իսկ թե ինչո՞ւ երեկվա եռակողմ հանդիպումից հետո հայտարարություն չի արվել, փաստաթղթեր չեն ընդունվել հարցադրմանն արձագանքելիս Արթուր Հովհաննիսյանը ճիշտ չի համարել մեկնաբանել բանակցային նրբություններին վերաբերող հարցերը: «Կարծում ենք, որ հանրության հետ հաղորդակցվելու ժամանակն այն է, երբ կմոտարկենք մեր մոտեցումները, այսինքն` հնարավորինս ամեն ինչ հստակ կլինի, տարընթերցումների տեղիք չտվող տեքստերի կհասնենք, այդ ժամանակ կհաղորդակցվենք մեր հանրության հետ»,- ընդգծել է նա:
Պատգամավորը հիշեցրել է, որ գոյություն ունի մեկ փաստաթղթի նախագիծ, դա բոլորին հայտնի խաղաղության պայմանագրի նախագիծն է:
Վլադիմիր Վարդանյանն իր հերթին ընդգծել է, որ 2020 թվականի նոյեմբերի 9-ից հետո որոշ շրջանակների համար ձեռնտու է խոսել, այսպես կոչված, հապճեպ կնքվող փաստաթղթի մասին: Նա հավելել է, որ հարաբերությունների կարգավորումը կանոնակարգվում է միջազգային փաստաթղթով, որը շրջանառվում է կողմերի միջեւ եւ փորձ է արվում համաձայնեցնել: «Այդ գործընթացը գնահատում եմ դրական: Սա կարեւոր երաշխիքներից մեկն է, որ կողմերը տրամադրված են համաձայնեցնել իրենց կամքերը եւ կնքել փաստաթուղթ, որը փոխադարձ ընդունելի դրույթներ կպարունակի, բայց այդ փաստաթուղթը ենթակա է համապատասխան ներպետական ընթացակարգեր անցնելուն եւ ուժի մեջ մտնելուն: Դա մեկ, երկու կամ երեք օրվա գործընթաց չէ»,- ասել է նա:
Պատգամավորի գնահատմամբ նուրբ թեմա է եւ ինչ-որ բան հրապարակելով` օգնել չենք կարող այդ գործընթացին, խանգարել` կարող է յուրաքանչյուրը: «Մեկ սխալ արտահայտություն, մեկ ոչ հստակ արտահայտություն կարող է հանգեցնել բանակցային գործընթացի ոչ բարենպաստ զարգացումներին»,- փաստել է Վլադիմիր Վարդանյանը:
Այդ մասին հայտնում են ՀՀ ԱԺ-ից։
