Վարուժան Ավետիսյանին հիվանդանոցից արդեն տեղափոխել են քրեակատարողական հիմնարկ

ԱԺԲ անդամ Վարուժան Ավետիսյանը այսօր առավոտյան՝ ժամը 11․00-ին, տեղափոխվել է քաղաքացիական հիվանդանոց, բայց ժամը 15․00-ին վերադարձվել է  «Նուբարաշեն»․այս մասին մեզ հայտնեց ՔԿԾ հանրային կապերի բաժնի պետ Նոնա Նավիկյանը։

Թե ինչ խնդրով է տեղափոխվել հիվանդանոց և ինչ է ախտորոշվել՝ հարցին նա չպատասխանեց․ ՔԿԾ-ի լիազորությունների մեջ չի մտնում։

Հիշեցնենք, որ ըստ հարազատների՝ Ավետիսյանը դեռևս 2014 թվականից տառապում է խիստ վտանգավոր համախտանիշով (հեմոլիտիկ-ուրեմիկ համախտանիշ), որին բնորոշ է ալիքաձև ընթացք՝ կյանքին սպառնացող` պարբերաբար սրացումներով։  Սրացումներն ունենում են հստակ նախանշաններ՝  ալիքաձև դողի տեսքով և զարգանում են շատ անսպասելի ու արագ՝ առաջացնելով երիկամային սուր անբավարարության պատկեր։

Ազգային-ժողովրդավարական Բեւեռի պահանջն էր Վարուժան Ավետիսյանին տեղափոխել քաղաքացիական հիվանդանոց՝ մշտական հսկողության տակ գտնվելու նպատակով: