Տիգրան Պետրոսյանը շարունակում է հետապնդումը
Մոսկվայում շարունակվող շախմատի «Աերոֆլոտ Օպենի» ուժեղագույնների խմբում մեր գրոսմայստեր Տիգրան Պետրոսյանը 7-րդ տուրում հաղթեց ռուսաստանցի Իլդար Խայրուլինին: Նա վաստակեց 4,5 միավոր եւ շարունակում է հետապնդել առաջատարներին: Այժմ Տիգրան Պետրոսյանը զբաղեցնում է 9-րդ հորիզոնականը:
Իսկ ահա Սերգեյ Մովսիսյանը առաջին պարտությունը կրեց մրցաշարում` զիջելով սերբ Բոյան Վուչկովիչին: Այս սայթաքումից հետո մեր շախմատիստը կորցրեց մրցանակային տեղ զբաղեցնելու հնարավորությունը: Ավետիք Գրիգորյանը հաշտություն կնքեց ռուսաստանցի
Ալեքսանդր Ռյազանցեւի հետ եւ վաստակած միավորներով (3,5) հավասարվեց Մովսիսյանին:
Աղյուսակը շարունակում է միանձնյա գլխավորել վիետնամցի Լիեմ Լին, ով ունի 6 միավոր: Նրան հաջորդող յոթ շախմատիստները իրենց ակտիվում ունեն 5-ական միավոր:
Նախավերջին` 8-րդ տուրում, Տիգրան Պետրոսյանը սեւերով կխաղա Վադիմ Զվյագինցեւի հետ: Սերգեյ Մովսիսյանը եւ Ավետիք Գրիգորյանը հանդես կգան սպիտակ խաղաքարերով եւ ուժերը կչափեն համապատասխանաբար Հունգարիայի գրոսմայստեր Էդուարդո Իտուրիզագայի եւ ռուսաստանցի Իգոր Կուրնոսովի հետ:
