Մարզական նորություններ
Արծաթ եւ բրոնզ
Հունգարիայի մայրաքաղաք Բուդապեշտում մեկնարկած ձյուդոյի աշխարհի գավաթի խաղարկության առաջին օրը մեր մարզիկները նվաճեցին երկու մեդալ:
60 կգ քաշային Հովհաննես Դավթյանը հաղթահարելով նախնական փուլի իր բոլոր մրցակիցներին, մտավ եզրափակիչ, որտեղ ուժերը չափեց ձյուդոյի հայրենիքի ներկայացուցիչ, ճապոնացի Հիրոֆումի Յամամոտոյի հետ: Մեր մարզիկը, ավաղ, պարտություն կրեց եւ բավարարվեց արծաթե մեդալով:
66 կգ ձյուդոյիստների մրցաշարում Արմեն Նազարյանը հասավ մինչեւ կիսաեզրափակիչ, սակայն այդ փուլում պարտվեց ճապոնացի Յունպեյ Մորիշիտային: 3-րդ տեղի համար մարտում հրազդանցի մարզիկը հաղթեց հունգարացի Ժոլտ Գորյանաչին եւ բրոնզե մեդալ նվաճեց:
Նույն քաշային կարգում Համբարձում Տոնոյանը պայքարից դուրս մնաց 1/8 եզրափակիչում:
73 կգ քաշային Ռոբերտ Վարդանյանին նույնպես չհաջողվեց հաղթահարել այդ արգելքը, իսկ Արտյոմ Բաղդասարյանը առաջին իսկ մարտում անհաջողության մատնվեց եւ դուրս մնաց հետագա պայքարից:
Վաղը Հայաստանից հանդես կգա միայն 100 կգ քաշային Հակոբ Առաքելյանը, որը կմրցի մոնղոլ ձյուդոիստ Նայդան Տուվշինբայարի հետ:
Հաղթեց միայն «Գանձասարը»
Ֆուտբոլի Հայաստանի բարձրագույն խմբի թիմերը նախապատրաստվելով նոր մրցաշրջանին հերթական ստուգողական հանդիպումերը անցկացրին արտասահմանյան թիմերի հետ:
Անթալիայում ուսումնամարզական հավաք անցկացնող Երեւանի «Բանանցը» 1:2 հաշվով զիջեց Ռումինիայի առաջնությունում 11-րդ տեղում ընթացող Բիստրիցայի «Գլորիային»` 1:2: Երեւանի «Ուլիսը» խոշոր հաշվով պարտվեց Սանկտ Պետերբուրգի «Զենիթի» փոխարինող կազմին` 0:4, իսկ ահա Կապանի «Գանձասարը» նույն հաշվով հաղթեց Ռուսաստանի պրեմիեր լիգայի մասնակից «Կռիլյա Սովետովի» 2-րդ թիմին:
Կիպրոսում հավաք անցկացնող Երեւանի «Միկան» ստուգողական առաջին խաղում 0:3 հաշվով զիջեց Չեխիայի «Վիկտորիային»:
