Մեր ժողովրդավար գործընկերներից ակնկալում ենք ժողովրդավարության պաշտպանությանն ուղղված օժանդակություն. Արթուր Հովհաննիսյան

ՀՀ ԱԺ Հայաստան-Չեխիա բարեկամական խմբի ղեկավար, «Քաղաքացիական պայմանագիր» խմբակցության քարտուղար Արթուր Հովհաննիսյանը սեպտեմբերի 29-ին հանդիպել է Չեխիայի ԱԳ նախարարության Արեւելյան Եվրոպայի վարչության պետ Էվա Դվորժակովայի գլխավորած պատվիրակությանը:

Արթուր Հովհաննիսյանը կարեւորել է հյուրերի այցը մեր երկիր այս դժվարին փուլում: Բարեկամական խմբի ղեկավարը, որպես կարեւորագույն ուղղություն, ընդգծել է ժողովրդավարությունը եւ փաստել, որ այս պահին մեր պետության անվտանգության գլխավոր երաշխիքներից մեկը ժողովրդավարությունն է:

Պատգամավորը վստահեցրել է, որ Հայաստանը նախաձեռնող է այս ուղղությամբ հարաբերությունները խորացնելու հարցում: Նրա համոզմամբ՝ Ադրբեջանի ներխուժումը ՀՀ ինքնիշխան տարածք հենց ավտորիտար եւ ժողովրդավար ռեժիմների պայքար է: «Մեր ժողովրդավար գործընկերներից ակնկալում ենք ժողովրդավարության պաշտպանությանն ուղղված օժանդակություն»,- հավելել է Արթուր Հովհաննիսյանը:

Պատգամավորը խորհրդարանական հարթակում սերտ համագործակցությունն ընդլայնելու պատրաստակամություն է հայտնել: Նա անդրադարձել է նաեւ ՀՀ տնտեսական զարգացման ցուցանիշներին՝ նշելով, որ 44-օրյա պատերազմից հետո անգամ տնտեսական աճը շարունակվում է: Ըստ նրա՝ երկրի անվտանգությունը պայմանավորված է նաեւ տնտեսական կայունությամբ:

Էվա Դվորժակովան ընդգծել է, որ իր երկիրը շահագրգռված է Հայաստանի հետ համագործակցության շարունակական զարգացմամբ եւ հետաքրքրված է Հարավային Կովկասում տիրող իրավիճակով: Նա կարեւորել է ժողովրդավարական գործընթացների շարունակական զարգացումը՝ ընդգծելով, որ Չեխիան՝ որպես ԵՄ-ում նախագահող երկիր, պատրաստ է օժանդակել Հայաստանին այդ ճանապարհին:

Անդրադառնալով տարածաշրջանային խնդիրներին՝ հյուրն ընդգծել է Եվրոպական խորհրդի նախագահ Շառլ Միշելի միջնորդական ջանքերը խաղաղության առաջմղման հարցում եւ հավելել, որ պատրաստ են օգնություն տրամադրել եւ աջակցել խնդրի լուծմանը: «Շառլ Միշելի գործողություններն ամբողջությամբ հավանության են արժանանում Չեխիայի՝ ԵՄ նախագահության կողմից»,- նշել է նա: Կողմերը համակարծիք են եղել, որ երկկողմ համագործակցությունն ընդլայնելու մեծ ներուժ կա: Անդրադարձ է եղել մի շարք ծրագրերի իրականացման հնարավորությանը, ներդրումների խթանմանը, տարբեր ոլորտներում համագործակցության զարգացմանը, մասնավորապես, անվտանգության, տնտեսական, բնապահպանական ոլորտներում: Նշենք, որ եկող շաբաթ նախատեսվում է Չեխիայի ԱԳ նախարարության անվտանգության հարցերով վարչության պետի այցը Հայաստան, որի ժամանակ առավել մանրամասն կքննարկվեն անվտանգության ոլորտում համագործակցության ծրագրերը:

ՀՀ Ազգային ժողով