Փոփոխվել է Փարիզ-2024-ի ըմբշամարտի ուղեգրերի բաշխումը
Աջակցիր «Ա1+»-ինԸմբշամարտի միջազգային ֆեդերացիան հաստատել է Փարիզի 2024թ օլիմպիական խաղերի վարկանիշների բաշխման գործընթացը: Այդ մասին տեղեկացնում Հայաստանի ըմբշամարտի ֆեդերացիայի մամուլի ծառայություն:
Նախաօլիմպիական աշխարհի առաջնությունում նախկին 6 ուղեգրի փոխարեն կխաղարկվի 5-ը: Ուղեգրեր կնվաճեն 4 մեդալակիրները և բրոնզե մեդալի համար գոտեմարտում պարտված ըմբիշներից մեկը: Նրանք ևս մեկ գոտեմարտ կանցկացնեն և հաղթողը կնվաճի 5-րդ ուղեգիրը:
Մայրցամաքային վարկանիշային մրցաշարերում փոփոխություններ չկան: Ուղեգիր են նվաճում եզրափակչի մասնակիցները:
Մայրցամաքային օլիմպիական վարկանիշային մրցաշարին կարող են մասնակցել թվով այնքան ըմբիշներ, որքան մասնակցել են 2024 թվականի տվյալ մայրցամաքի առաջնությանը (մեր դեպքում՝ Եվրոպայի առաջնությանը):
Համաշխարհային վարկանիշային առաջնությունում ևս փոփոխություն կա: Եթե նախկինում այստեղ ուղեգրեր էին նվաճում միայն եզրափակչի մասնակիցները, ապա արդեն բրոնզե մեդալակիրը ևս հնարավորություն կունենա ուղևորվել Փարիզ: Այստեղ երկու բրոնզե մեդալակիրները կպայքարեն և լավագույն երրորդ տեղը գրավածը կնվաճի քաշի 3-րդ ուղեգիրը: