Պաշտպանը ոստիկանությունից պարզաբանումներ է պահանջել երեկվա բերման ենթարկվածների մասով
Աջակցիր «Ա1+»-ինՄարդու իրավունքների պաշտպանի գրասենյակից հայտնում են, որ 2022թ. օգոստոսի 24-ին Երևանի Ազատության հրապարակում արտոնված հավաքի մասնակիցներին բերման ենթարկելու առնչությամբ Մարդու իրավունքների պաշտպանի աշխատակազմի ներկայացուցիչներն այցելել են ոստիկանության համապատասխան բաժին՝ բերման ենթարկված անձանց իրավունքների պաշտպանությունն ապահովելու նպատակով։
Պաշտպանի ներկայացուցիչներն առանձնազրույցներ են ունեցել բերման ենթարկված անձանց հետ, կապի մեջ են գտնվել փաստաբանի հետ։ Հաջորդիվ Պաշտպանի աշխատակազմը Ոստիկանության կողմից տեղեկացվել է նաև, որ օրենքով սահմանված ժամկետում բերման ենթարկված բոլոր անձինք ազատ են արձակվել։ Բերման ենթարկելու հիմքերի ու երթի չթույլատրման վերաբերյալ Մարդու իրավունքների պաշտպանը պարզաբանումներ է պահանջել ոստիկանությունից։
Նշենք, որ երեկ Ազատության հրապարակում նախատեսված էր բողոքի ակցիա ընդդեմ ՌԴ-ի՝ Ուկրաինա ռազմական ներխուժման, որին մասնակցում էին ինչպես Հայաստանի քաղաքացիներ, այնպես էլ օտարերկրացիներ։ Ոստիկանությունը սկսեց բերման ենթարկել ակցիայի մասնակիցներին, որոնց թվում էր ռուս հայտնի բլոգեր Ալեքսեյ Ռոմանովը:
