Բացել լրահոսը Փակել լրահոսը
296460913_568819574721857_8454294823166542283_n
A A
Քաղաքականություն

Արթուր Սաքունցը դատական 2 հայց է ներկայացրել Նարեկ Մալյանի դեմ

ՀՔԱՎ նախագահ Արթուր Սաքունցը դատարան 2 հայց է ներկայացրել, որոնցով Նարեկ Մալյանից պահանջում է հերքել իր և կազմակերպության հասցեին հնչեցրած զրպարտությունը և փոխհատուցել արժանապատվությանը պատճառած վնասը 2019 թ․ դեկտեմբերի 7-ին Նարեկ Մալյանը, որը հայտնի է իրավապաշտպաններին թիրախավորելով, իր ֆեյսբուքյան էջում ՀՔԱՎ նախագահ Արթուր Սաքունցի մասին սուտ լուրեր է հրապարակել՝ նրա գործունեության վրա ստվեր գցելու, նրա՝ որպես իրավապաշտպանի պատիվն ու արժանապատվությունը հասարակության մոտ արատավորելու և նսեմացնելու նպատակով։

Ն․ Մալյանը Ա․ Սաքունցի՝ տարիներ առաջ տված հարցազրույցից վերցրել է առանձին հատվածներ և ներկայացրել համատեքստից դուրս՝ խեղաթյուրելով խոսքերի բովանդակությունը, դրանով ապատեղեկատվություն տարածել, թե Ա․ Սաքունցի ղեկավարած Հելսինկյան քաղաքացիական ասամբլեայի Վանաձորի գրասենյակը գումարներ է ստացել «հողերը վաճառելու նպատակով», և 2020 թ․ 44-օրյա պատերազմի պարտությունը վերագրել է Արթուր Սաքունցին ու ՀՔԱՎ-ին։

Զրպարտությունը հրապարակայնորեն հերքելու և պատվին, արժանապատվությանը պատճառած վնասի հատուցման պահանջներով Ա․ Սաքունցը 2019 թ․ դեկտեմբերի 19-ին դիմել է դատարան։ Հայցադիմումին ընթացք էր տրվել, սակայն շուրջ 1 տարի գործի քննությունը ձգձգվել է դատավորի ժամանակավոր անաշխատունակության պատճառով և միայն 2022 թ հունվարի 19-ին դատավոր Ա․ Մուշեղյանը որոշել է Նարեկ Մալյանի դեմ Արթուր Սաքունցի հայցը վարույթ ընդունել։

Գործը քննում է Կոտայքի մարզի ընդհանուր իրավասության դատարանը։ Հաջորդ դատական նիստը նշանակվել է 2022 թ․ հոկտեմբերի 20-ին՝ ժամը 16։00-ին, Կոտայքի մարզի ընդհանուր իրավասության դատարանի Աբովյանի նստավայրում։ Սա առաջին դեպքը չէ, որ Նարեկ Մալյանը փորձում է զրպարտության միջոցով նսեմացնել իրավապաշտպանների գործունեությունը և ժողովրդավարական արժեքները։

2021 թ․ փետրվարի 3-ին էլ Ն․ Մալյանը մեկ այլ հարցազրույցում մեղադրել է Ա․ Սաքունցին 44-օրյա պատերազմից հետո ոչ հայրենանպաստ գործունեության մեջ։ Սրա հիման վրա ևս Ա․ Սաքունցը զրպարտությունը հրապարակայնորեն հերքելու և արժանապատվությանը պատճառված վնասի հատուցման պահանջներով հայց է ներկայացրել դատարան։ Այս գործով նախնական դատական նիստը տեղի կունենա 2022 թ․ օգոստոսի 2-ին՝ ժամը 14։30-ին, Կոտայքի մարզի ընդհանուր իրավասության դատարանի Աբովյանի նստավայրում։

Հելսինկյան Քաղաքացիական Ասամբլեայի Վանաձորի գրասենյակ