Այսօր վաղ առավոտից ընդդիմության նախաձեռնած անհնազանդության ակցիաները վերսկսվել են։

Ակցիայի մասնակիցները շարունակում են փողոցներ փակել՝ այդ կերպ արտահայտելով իրենց բողոքն ու դժգոհությունը՝ պահանջելով ՀՀ վարչապետ Նիկոլ Փաշինյանի հրաժարականը։

Ոստիկանական խմբերը պահպանելու համար հասարակական կարգը բացում են փակ փողոցները՝ այդ ընթացքում նաև բերման ենթարկելով ՀՀ քաղաքացիներին։

Ակցայի մասնակիցների հետ են ԱԺ ընդդիմադիր խմբակցությունների պատգամավորները։ Քիչ առաջ Աբովյան փողոցի շրջակայքում ոստիկանները ուժ կիրառելով փորձում էին  բացել փակ փողոցը։ Այդ ժամանակ ցուցարարաների հետ էին ԱԺ « Հայաստան» խմբակցության պատգամավորներ Գեղամ Մանուկյանն ու Աննա Գրիգորյանը։

Հիշեցնենք՝ արդեն տևական ժամանակ է խորհրդարանական  ընդդիմությունը փողոցում է։ Եվ ինչպես նրանք են նշում՝ իշխանության հետ երկխոսելու միակ ճանապարհը ՀՀ վարչապետի հրաժարականն է։ Երեկ՝ Կառավարություն-ԱԺ հարցուպատասխանի ժամանակ խորհրդարանական ընդդիմության ներկայացուցիչները կարճ ժամանակով վերադարձան Ազգային ժողով և Նիկոլ Փաշինյանին ներկայացրեցին իրենց պահանջը, որից հետո բոյկոտելով նիստը հեռացան։

Մանրամասները՝ տեսանյութում։