Ազատության հրապարակում մեկնարկել է քննարկումը` քաղաքական, հասարակական ու փորձագիտական գործիչների մասնակցությամբ՝ հայ-թուրքական հարաբերությունների կարգավորման շուրջ ԱԺ լսումների ձախողման և հայտարարության համատեքստում։

 

Գեղամ Մանուկյանն ասաց, որ այս քննարկումը պետք է լիներ ԱԺ-ում՝ Հայաստան-Թուրքիա հարաբերությունների հետ կապված և հայտարարության տեքստ էին պատրաստել։ Ըստ Մանուկյանի՝ ԱԺ ղեկավարութրունը խախտել է կարգը և ԱԺ-ում լսումները առաջարկել են անցկացնել ապրիլի 24-ից հետո՝ վախենալով իրենց թուրք գործընկերներից։

 

«Հայաստան» խմբակցության պատգամավոր Արմեն Ռուստամյանը ներկայացրեց հայտարաության տեքստը՝ նշելով, որ այսօրվա իշխանության արածները հետաքրքիր ինքնախոստովանական բացահայտումներ են։ «Մենք այդ հայտարարությամբ գծում էինք կարմիր գծերը, որից հետո գնալու ենք պետականության կորստին»,- ասաց Արմեն Ռուստամյանը՝ նշելով, որ իրենց մտահոգությունները, որ այս իշխանությունները եկել են սպասարկելու «թուրք-ադրբեջանական» շահը՝ հաստատվեց։

 

Պատգամավորի խոսքով՝ իրենք իրենց նպատակից չեն շեղվելու և այդ հայտարարության լսումները լրամշակված տարբերակով լինելու են։

 

«Հայաաստանը երբեք դեմ չի եղել Թուրքիայի հետ հարաբերությունների կարգավորմանը, բայց երբեք կողմ չի եղել թուրքական պայմաններով հարաբերությունների հաստատմանը, և Թուրքիան էլ համաձայն չի եղել իր պայմաններից դուրս հարաբերությունների կարգավորմանը»,- ասաց Ռուբեն Մելքոնյանը՝ նշելով, որ հիմա ամենաանբարենպաստ պայմաններն են Թուրքիայի հետ հարաբերությունների կարգավորման համար։ Թուրքագետի խոսքով՝ Թուրքիան շարունակում է նախապայմանների լեզվով խոսել և այն թեզը, թե հայ-թուրքական հարաբերությունների կարգավորումն ընթանում է առանց նախապայմանների՝ սուտ է ։

 

Իրանագետ Վարդան Ոսկանյանն էլ նշեց, որ Իրանը բացահայտ չի կարող ասել, որ դեմ է հայ-թուրքական հարաբերությունների կարգավորմանը, բայց ակնհայտ է, որ իրանական շահերը բախվում են թուրքական ներկայությանը տարածաշրջանում։

 

Ըստ փորձագետի՝ իրանական կողմը տանում է Թուրքիային տարածաշրջանից դուրս մղելու քաղաքականություն։ «Հայաստան» խմբակցության պատգամավոր Էլինար Վարդանյանն էլ այս համատեքստում նշեց, որ օրվա իշխանությունների օրոք Հայաստանն ու Սփյուռքը հեռացան և արդյունք ունենալու համար պետք է միաբանվել։

 

Ընդդիմադիր պատգամավորի խոսքով՝ այս իշխանությունները հանձնել են Արցախի 75 տոկոսը և նրանց համար սա այլևս նախապայման չէ։

 

Պատգամավորը հակադարձում է՝ Թուրքիան շարունակում է նախապայմանների լեզվով խոսել օրվա իշխանությունների հետ և ընթերցեց այսօրվա հայտարարության կետերը, որոնք պետք է ընթերցվեր ԱԺ-ում։ Մանրամասները՝ տեսանյութում։