Խոսքի ազատության պաշտպանության կոմիտեն նախաձեռնել էր «Մեդիային վերաբերող օրենսդրության բարեփոխումների անհրաժեշտությունը Հայաստանում» թեմայով «կլոր սեղան» քննարկում, որի ընթացքում ներկայացվեցին ԶԼՄ-ներին վերաբերող օրենսդրության խնդիրներն ու դրանց հաղթահարման հնարավորությունները, ոլորտի զարգացման հայեցակարգի մշակման հեռանկարները։

Անցկացվեց քննարկում փորձագետների, օրենսդիր և գործադիր իշխանությունների ներկայացուցիչների, իրավապաշտպանների, փաստաբանների, լրագրողների մասնակցությամբ։

Աշոտ Մելիքյանի խոսքով՝ մեդիայի բնագավառում շատ լուրջ փոփոխություններ են անհրաժեշտ և նկատեց, որ տեղեկատվական բնագավառում բազմաթիվ բացեր կան։

«Կառավարությունն աշխատում է տեղեկատվական միասնական քաղաքականության մշակման ուղղությամբ և օրենսդիրն իր առաջարկություններով է հանդես գալիս և հենց սա պատճառ դարձավ այս նախաձեռնության համար»,- ասաց խոսքի ազատության պաշտպանության կոմիտեի նախագահ Աշոտ Մելիքյանը։

ՀՀ ԱԺ գիտության, կրթության, մշակույթի և սպորտի հարցերի մշտական հանձնաժողովի նախագահ Սիսակ Գաբրիելյանն ասաց, որ այսօր կստորագրվի հուշագիր, որը նոր իրողությունների պայմաններում ունի կարևորագույն նշանակությունը։

Ըստ Սիսակ Գաբրիելյանի՝ բոլոր կողմերը նկատել են մեդիաին վերաբերող օրենսդրական բարեփոխումների անհրաժեշտությունը Հայաստանում։

Սիսակ Գաբրիելյանը նշեց, որ համագործակցության հուշագրի ստորագրումից հետո նախատեսում են դերաբաշխում կատարել և  աշխատանքը համակարգել և իր մասով նշեց, որ առաջիկայում նախատեսում է հանդիպումներ ԶԼՄ ներկայացուցիչների հետ գործընթացի թափանցիկությունն ապահովվելու համար։

Արդարադատության փոխնախարար Երանուհի Թումանյանցն ասաց, որ իր համար թեման շատ հոգեհարազատ է, քանի որ ինքը գալիս է քաղհասարակությունից և հավելեց, որ սա շատ բնական գործընթաց է և առողջ քննադատություն ունենալը կարևոր ձեռքբերում է։

Մեդիանախաձեռնությունների կենտրոնի գործադիր տնօրեն Նունե Սարգսյանը ներկայացրեց մեդիա ոլորտի զարգացման մասին պատկերացումները և հայեցակարգի մշակման անհրաժեշտությունը։

Ըստ Նունե Սարգսյանի՝ թվային ժամանակաշրջանը բերել է նրան, որ անհրաժեշտ է փոփոխել մեդիային վերաբերող օրենսդրությունը և ներկայացրեց հայեցակարգը։

Սիսակ Գաբրիելյանը, Երանուհի Թումանյանցը և Աշոտ Մելիքյանը համագործակցության հուշագիր ստորագրեցին։