Ջուր` լեհական գումարներով
Կապանի տարածաշրջանի Շիկահողի համայնքում 2,8կմ երկարությամբ նոր ջրագիծ է կառուցվել:Աշխատանքները իրականացվել են Լեհաստանի Հանրապետության արտգործնախարարության եւ 2010թ.-ի Լեհաստանի կողմից արտասահմանյան երկրներին օգնության տրամադրման ծրագրի շրջանակներում:
Շինարարական աշխատանքները մեկնարկել էին երկու ամիս առաջ:Ծրագիրը արժեցել է 6,5 միլիոն դրամ:
Մինչ նոր ջրագծի կառուցումը Շիկահողում խմելու ջուր եղել է իր ներքին ցանցով, որը սակայն չի բավականացրել 220 բնակիչ ունեցող գյուղին:
Այսօր ջրագծի հանդիսավոր բացման արարողությունն էր,որին մասնակցում էին ՀՀ-ում Լեհաստանի արտակարգ եւ լիազոր դեսպան Զդիսլավ Ռաչինսկին, Սյունիքի մարզպետ Սուրիկ Խաչատրյանը:
Լեհաստանի դեսպանի խոսքերով` իրենց երկրի կառավարությունը ցանկանում է հետագայում եւս աջակցել Սյունիքի մարզին և հույս հայտնեց , որ կգտնվեն նոր ոլորտներ` համագործակցությունը շարունակելու համար: Լեհաստանի կառավարությունը Սյունիքի մարզի մեկ այլ գյուղին Ներքին Խոտանանին տրամադրել է գյուղտեխնիկա:
