Բացել լրահոսը Փակել լրահոսը
ընտրություններ մատնահետք
A A
Քաղաքականություն

Այսօր ՏԻՄ ընտրություններ են անցկացվում 4 մարզերի 5 համայնքներում

Հայաստանի 3 քաղաքներում այսօր` նոյեմբերի 14-ին, տեղական ինքնակառավարման մարմինների ընտրություններ են։ 

Այսօր համամասնական ընտրակարգով ընտրություններ են տեղի ունենալու Սյունիքի մարզի Կապան, Տավուշի մարզի Իջևան և Լոռու մարզի Ստեփանավան խոշորացված համայնքներում։

Կապանում ընտրություններին մասնակցում են «Շանթ դաշինք» ազգայնական կուսակցությունը, որի ցուցակը ղեկավարում է Գևորգ Փարսյանը և «Քաղաքացիական պայմանագիր» կուսակցությունը, որի ցուցակը ղեկավարում է Դավիթ Դանիելյանը։

Իջևանում ընտրություններին մասնակցում են Հայ Յեղափոխական Դաշնակցություն կուսակցությունը, որի ցուցակը ղեկավարում է Վահան Ղազումյանը և «Քաղաքացիական պայմանագիր» կուսակցությունը, որի ցուցակը ղեկավարում է Արթուր Ճաղարյանը։

Ստեփանավանում ընտրություններին մասնակցում է երեք ուժ՝ «Բարգավաճ Հայաստան» կուսակցությունը, որի ցուցակը գլխավորում է Հարություն Ղարագյոզյանը, «Հայ ազգային կոնգրես» կուսակցությունը, որի ցուցակը գլխավորում է Վանո Հակոբյանը և «Քաղաքացիական պայմանագիր» կուսակցությունը, որի ցուցակը գլխավորում է Արմեն Գրիգորյանը։

Առավոտյան՝ ժամը 8.00-ին, ՀՀ ընտրական օրենսգրքով սահմանված կարգով բացվել են ընտրությունների համար ձևավորված բոլոր 99 ընտրական տեղամասերը և ընդունել առաջին ընտրողներին: ՏԻՄ ընտրությունների ժամանակ ընտրողների էլեկտրոնային գրանցման նպատակով օգտագործվում է 167 տեխնիկական սարքավորում:
 
Ընտրություններին դիտորդական առաքելություն իրականացնելու համար հավատարմագրվել են 8 տեղական հասարակական կազմակերպություններ, ինչպես նաև քվեարկության օրն ընտրությունների և քվեարկության վերաբերյալ լուսաբանում իրականացնելու համար հավատարմագրվել են 20 զանգվածային լրատվության միջոցներ:
 
Հիշեցնենք, որ ընտրությունների առաջին փուլը տեղի էր ունեցել հոկտեմբերի 17-ին, ևս մեկ փուլ էլ սպասվում է դեկտեմբերի 5-ին:

ՏԻՄ ընտրությունները հիմնականում խոշորացվող համայնքներում են. Հայաստանի 441 համայնքներ միավորվելով՝ դառնում են 38-ը: Ընդհանուր Հայաստանում ձևավորվում է 79 համայնք։