Այսօր կառավարության դիմաց «Հայաստան» դաշինքի կազմակերպած հանրահավաքը անցավ ոստիկանների և ցուցարարների միջև հրմշտոցներով։

Բերման ենթարկվեցին մոտ երկու տասնյակ քաղաքացիներ։

Հանրահավաքի սկզբում «Հայաստան» դաշինքի պատգամավոր Գեղամ Մանուկյանը ասաց, որ պատրաստվում են մտնել կառավարության շենք և վարչապետ Ն․ Փաշինյանից պահանջել հաշվետվություն, թե ինչ հիմքով են ադրբեջանական մաքսակետեր տեղադրվել Գորիս-Կապան ավտոճանապարհին։ 

Պատգամավոր Աննա Գրիգորյանը նշեց, որ այսօր ինքը պատրաստվում է հենց այդ նույն ճանապարհով գնալ Կապան և հասկանալ,  թե ինչ է կատարվում այնտեղ։  Աննա Գրիգորյանը նաև հարց բարձրացրեց․ «Ինչպես է օրինակ Գորիսից-Կապան գնացող ուսուցիչը անցնելու այդ մաքսակետերով»։

 «Հայաստան» դաշինքի մի շարք պատգամավորներ փորձեցին մուտք գործել կառավարության շենք, սակայն ոստիկանները նրանց թույլ չտվեցին և սկսվեց հրմշտոց քաղաքացիների և ոստիկանների միջև։

Հանրահավաքին ներկա էր նաև «Պատիվ ունեմ» դաշինքի պատգամավոր Տիգրան Աբրահամյանը։ Պատգամավորը նշեց, որ իշխանությունը յուրաքանչյուր բանակցությունից առաջ նեղացնում է իր հնարավորությունները  և փաստացի Սյունիքում մի շարք բնակավայրեր անվտանգային խոշոր խնդիրներ ունեն․ «Եթե նույնիսկ որևէ փուլում այլընտրանքային ճանապարհ ստեղծվի, անվտանգային խնդիրը միևնույն է լինելու է»։

Այնուհետև «Հայաստան» դաշինքի պատգամավորներից գնացին ոստիկանական բաժիններ, ձերբակալված քաղաքացիական անձանց մասին տեղեկատվություն իմանալու համար։