Յոգայի ոլորտը Հայաստանում չի վերահսկվում՝ թերուս ուսուցիչը կարող է վնասել (տեսանյութ)
Աջակցիր «Ա1+»-ինԵրևանում 3 տասնյակից ավելի վայր կա, որտեղ կարելի է զբաղվել յոգայով, սակայն ոլորտն առ այսօր չի վերահսկվում։ Դասավանդել կարող են բոլորը՝ անկախ փորձառությունից և հավաստագրված լինելուց։ Սա խնդիր է՝ ասում են մասնագետները, քանի որ թերուս ուսուցիչը կարող է ոչ թե օգնել, այլ՝ վնասել։
«Սամադհի» յոգա-ստուդիայի առօրյան սկսվում է ողնաշարի, մկանների ամրացմանը, ճկունությանը նպաստող դիրքերով ու ձգումներով՝ ասանաներով, շնչառական վարժանքներով։ Հայաստանում հիմնական պահանջարկն ունի «հաթհա» յոգան, որի շնորհիվ ունենում են սլացիկ մարմին։ Մինչդեռ յոգան ունի ինչպես ֆիզիկական, այնպես էլ մտավոր և հոգևոր բաղադրիչներ։
«Սամադհի» ստուդիայի դասավանդման մեթոդն այս բոլորի համադրությունն է, որը կիրառելով՝ ինքնաբերաբար սկսում ես առողջանալ՝ ասում է ստուդիայի հիմնադիրը։ Հայաստանում կա յոգայի վերաբերյալ տեղեկատվության պակաս։
Ավելի քան 10 000 տարվա պատմություն ունեցող այս ուսմունքին Սուվար Սուվարյանը տիրապետել է Հիմալայներում՝ Տիբեթում։ Ստուդիան նա անվանել է «Սամադհի», որը յոգայի 8-րդ աստիճանն է։ Սանսկրիտից թարգմանաբար նշանակում է գերգիտակից վիճակ, գերպայծառացում։ Նա վստահ է՝ յոգայով զբաղվել կարող են բոլորը՝ սկսած 7 տարեկանից։ Դրա համար անհրաժեշտ է շատ քիչ բան՝ առողջ լինելու ցանկություն, քանի որ յոգ լինել՝ նախեւառաջ նշանակում է առողջ լինել։
Մանրամասները՝ տեսանյութում։
