Բացել լրահոսը Փակել լրահոսը
A A
Քաղաքականություն

Պայքարը շարունակելու ենք. «Հայաստան» դաշինքի ղեկավարը` մանդատները վերցնել–չվերցնելու մասին (տեսանյութ)

Սա նախագահական ընտրություն չէ և մեկ մարդու հաղթանակի համար չէ։ Խորհրդարանական ընտրություններում պարտվում են այն ուժերը, որ խորհրդարան չեն մտնում։ Ովքեր անցնում են, պարտվող չեն համարվում․ Այս մասին «Հայաստան» դաշինքի առաջնորդների ասուլիսում ասաց Ռոբերտ Քոչարյանը՝  շնորհակալություն հայտնելով բոլոր իրենց ընտրողներին։

Քոչարյանն ասաց, որ իրենց ենթադրմամբ եղել են զանգվածային խախտումներ։ Իրենք ակնհայտ տեսել ենք վարչական ռեսուրսի կիրառում և դիմելու են Սահմանադրական դատարան՝ ընտրությունների արդյունքները քննարկելու համար։

«Այն մանդատը, որ ստացել է այս իշխանությունը, դա նրանց հանդեպ վստահության մանդատը չէ։ Մեր բոլոր հանդիպումները եղել են ավելի մարդաշատ, քան իշխանության հավաքները, ավելի հզոր և էներգետիկայով, քան իշխանության հավաքները», - ասաց Քոչարյանը։

 

Իշխանությունը շատ ավելի մեծ արդյունքներ է գրանցել հենց գյուղական վայրերում, նշեց նա և եթե քարոզարշավը լիներ 1-2 շաբաթ ավելի, իրենք կփոխեին նաև այդ պատկերը. «Մենք ժամանակ չունեցանք գյուղերում շատ քարոզարշավ անել»։

Նրա խոսքով՝ մանդատները վերցնել չվերցնելու վերաբերյալ դեռ դաշինքում վերջնական որոշում չունեն։ Բայց նա վստահ է, որ այս ընտրությունները փոխեցին քաղաքական լանդշաֆտը և «Հայաստան» դաշինքի մուտքը քաղաքական այս պայքարի մեջ ցունամիի պես մի բան էր։

Իշխանության երեկվա հանրահավաքից Քոչարյանի մոտ տպավորություն է ստեղծվել, որ նրանք աշխատելու են նույն ոճով, ինչպես աշխատում էին այս երեք տարիներին. «Իրենք ընկալել են այս քվեները որպես վստահություն հենց իրենց և ընկալում են, որ ժողովուրդը համաձայն է և ուզում է, որ շարունակեն նույն ոճով։

Մինչդեռ իմ համոզմամբ այլ բան է կատարվել այս ընտրություններում։ Իսկ եթե իրենք շարունակեն նույն ոճով, վենդետաներով, ներքաղաքական լարվածությամբ, ապա ես կասկած չունեմ, որ Հայաստանը կանգնած է լինելու ևս մեկ արտահերթ ընտրությունների առջև»։