Ազգային ժողովի արտահերթ նիստ գումարելու համար այժմ ընդդիմադիրներով կազմում ենք հայտարարություն՝ ԱԺ ճեպազրույցում ասաց ԼՀԿ խմբակցության ղեկավար Էդմոն Մարուքյանը։

 

Նրա խոսքով՝ բովանդակությունն այն է, որ ՀՀ Սահամանադրության և միջազգային պայմանագրերի մասին օրենքի համաձայն՝ քաղաքական, ռազմական, մարդու իրավունքներին առնչվող որևէ փաստաթուղթ ստորագրվելու պարագայում պետք է այն վավերացվի խորհրդարանում․ «ՀՀ ժողովրդի թիկունքում հերթական անգամ փաստաթուղթ է նախապատրաստվել, որի բովանդակությունից տեղեկություն չունեն ո՛չ խորհրդարանի պատգամավորները, ո՛չ Կառավարության անդամների մեծ մասը, ո՛չ էլ ընտրված որևէ այլ պաշտոնյա։ Կրկին առանց ժողովրդի կամ ներկայացուցիչների հետ քննարկումների, իրազեկելու նրանց հերթական գործընթացն է ընթանում»։

 

Մարուքյանի խոսքով՝ այդ ամենն էլ հիմք հանդիսացան այսօր նախաձեռնել ԱԺ արտահերթ նիստ։ Նա ասաց, որ խոսել է նաև ԲՀԿ ներկայացուցիչ Արման Աբովյանի հետ, քննարկել են նիստ գումարելու հարցը։ Առանց նախագծի հնարավոր չէ արտահերթ նիստ գումարել և հայտարարությունը կարող է լինել որպես փաստաթուղթ։

 

«Ես առավոտյան հանդես եմ եկել հայտարարությամբ, որ վարչապետը պետք է մանրամասն ներկայացնի՝ ինչի մասին է խոսքը գնում և ես սպասում էի, որ նա դա կանի Կառավարության նիստի ժամանակ, բայց նա խուսափեց և ասաց, որ փաստաթուղթը 100%-ով բխում է ՀՀ շահերից։ ՀՀ շահերի ընկալումները շատ տարբեր կարող են լինել մեզ համար, վարչապետի համար և այլ ուժերի համար», - նկատեց Էդմոն Մարուքյանը։

 

Նա նշեց, որ ժողովրդի ճնշումը կարող է լինել, որի արդյունքում չի ստորագրվի կամ չի վավերացվի այդ փաստաթուղթը, և եթե իրենք խորհրդարանական մեծամասնություն են, չի նշանակում, որ կանեն այն, ինչ կուզեն։

 

«Մեր լիազորությունների շրջանակներն այն է, ինչ ձեզ ասում եմ։ Այո՛, կարող ենք 10 լիտր բենզին վերցնել ու մի շենք այրել, եթե դա օգուտ կտա, եկեք անենք։ Բա որ 73% գնում, Նիկոլ էիք ընտրում, ի՞նչ էիք սպասում։ Երբ ունենում եք իշխանություն, որ 73% հանրապետական ընտրության ժամանակ է ձայն հավաքում, 83%՝ Երևանի ընտրությունների ժամանակ, հետո էսպես է լինելու», - ասաց Մարուքյանը։

 

Իշխանությունն ինչ ուզենա, նրա խոսքով, չի կարող անել, եթե ժողովուրդը չտա իշխանությանը լիազորություն։ Հետո՝ ունեցած աահմանադրությամբ, որ ժառանգել է հեղափոխական իշխանությունը և չի փոխել մինչև այսօր, դրանք այն լիազորություններն են, որ կան․ «Եվ այդ Սահմանադրության հայրերն այսօր ամենաբարձր գոռացողներն են։ Այս ապականված համակարգը, որ դրել են և Նիկոլին էլ դրել են այդ համակարգի վրա, նրանք են գոռում ամենաբարձրը, որ լիազորություններ չկան։ Հիմա մենք ունենք արտահերթ նիստ հրավիրելու լիազորություն, հրավիրում ենք, ուրիշ ի՞նչ անենք»։

 

Հարցին, թե ՀԱՊԿ-ին դիմելուց հետո ի՞նչ արձագանքներ կան թե՛ ՀԱՊԿ-ից, թե՛ Ռուսաստանից, Մարուքյանը պատասխանեց, որ ՀԱՊԿ-ի որևէ ձևաչափում իրենց ներգրավված չեն․ «Ես ՌԴ պետդումայի նախագահին ուղիղ ասել եմ, որ մենք ՀԱՊԿ պառլամենտական ասամբլեայից ակնկալում ենք հստակ արձագանք, որ անդամ պետության սահմանը, շփման գիծը չպետք է խախտվի և անդամ պետության տարածքից պետք է դուրս գան ադրբեջանական զորքերը»։

 

Պատգամավորի խոսքով՝ եթե Հայաստանը չի պաշտպանում իր սահմանը, չպետք է ակնկալել, որ Ռուսաստանն է իր զորքերին տանելու մեր սահմանին։ Բացի այդ, 500 զինվորին ոչնչացնելը Զինված ուժերի համար մեծ խնդիր չէ, սակայն պետք է հաշվի առնել դրան հաջորդող քայլերն ու սցենարը․ «Դա նշանակում է, որ պատերազմից 6 ամիս անց Հայաստանը կներքաշվի պատերազմի մեջ արդեն ՀՀ տարածքում։ Եթե կա տարբերակ բանակցություններով այս վիճակից դուրս գալ, դա լավ տարբերակ է։ Եթե դա չստացվի, այդ պատերազմը կա ու կա»։