30 տարիների ընթացքում իշխանություններն ունեցել են նաեւ թերություններ, այսօրվա իշխանությունները, 2018-ից հետո բոլոր արժեքները հավասարեցրին գետնին, ոչնչացրին: Այս մասին, այսօր՝ մայիսի 9-ին, «Հայաստան» դաշինքի հանրահավաքից հետո լրագրողների հետ զրույցում նշեց պաշտպանության նախկին նախարար Սեյրան Օհանյանը․

«Պլուս դրան, այն բոլոր թերությունները, որ գոյություն ունեին, բազմապատկեցին  անգրագետ ղեկավարման պատճառով, մանրախնդիր լինելու պատճառով, որովհետև Երկրի ղեկավարումը պետք է լինի միայն մեծահոգի, փորձառու ճանապարհ անցած մարդկանց ձեռքերում: Հիմա այս դաշինքը փորձառու անձանց հետ միասին գալիս է նորից հին մեր արժեքները վերականգնելու, եւ ավելացնելու,  իրենց իսկ հին թերությունները նվազեցնելու, հավասարեցնելու զրոյի՝ հանուն մեր ժողովրդի անվտանգության, սոցիալ-տնտեսական զարգացման եւ միասնականության»:

Հարցին, թե արդյո՞ք հնարավոր է Շուշին ու Հադրութը հետ բերել, Սեյրան Օհանյանն արձագանքեց․

 «Ցանկացած գործողություն իրականացնելու համար պետք է ռեալ,  սթափ  գնահատել ստեղծված ռազմաքաղաքական իրադրությունը: Միայն այդ գնահատմամբ, հակառակորդների հնարավորությունների գնահատմամբ եւ նաեւ մեր հնարավորությունների գնահատմամբ, մեր հավաքական կամքի բազմապատկմամբ, ընդ որում՝ ոչ միայն անվտնգության համակարգում, այլ նաեւ լիարժեք արտաքին ներգրավվածություն ապահովող արտաքին, միջազգային հարբերություններով մենք կարող ենք միայն որոշել եւ Հայաստանի, եւ  Արցախի, եւ Շուշիի ապագան»:

Անդրադառնալով Սյունիքի անվտանգության խնդրին Սեյրան Օհանյանն ասաց, եթե կան սահմաններ հարեւան պետությունների հետ, այնտեղ անվտանգության գոտի չի լինում, լինում է սահմանապահ զորք, սահմանային ծառայությունը իրականացնելու համար համապատասխան ատրիբուտներ եւ նաև  պատրաստ բանակ․

«Անվտանգության գոտին այսօր ապահովելու հնարավորությունը մենք կորցրել ենք, որովհետեւ առանց դելիմիտացիայի եւ դեմարկացիայի, այսինքն սահմանազատումն իրականացրել ենք առանց պետական կամ միջազգային առումով գոյություն ունեցող ընթացակարգերի: Չեն եղել պայմաններ, չի եղել խաղաղության կամ այլ պայմանագիր հակառակորդի հետ, բայց մեր զինված ուժերը թողել են ռազմավարական բոլոր կետերը, ռազմավարական նշանակություն ունեցող ճանապարհներ, որոնք հիմա գտնվում են Ադրբեջանի վերահսկողության տակ՝ առանց հասկանալու, որ եթե հետագայում գնանք իրական սահմանազատման, եթե պետք լինի հակառակորդին ասել, որ պետք է հետ քաշվեք, շատ դժվար է լինելու այդ համաձայնությանը գալ»: 

Օհանյանը պնդեց՝ այս իշխանությունը պարտադրաբար կամ ինքնակամ պետք իր տեղը զիջի փորձառու իշխանություններին։