Մեր լեզուն մարդու, խաղաղության լեզուն է, նրանցը՝ մարդասպանության». Այման Օքեյլ

Այսօր՝ ապրիլի 23-ին, տեղի ունեցավ «44-օրյա պատերազմն ու հետևանքները» թեմայով կլոր-սեղան քննարկումը, որին ներկա էին միջազգային MAAT հիմնադրամի ղեկավար անձնակազմը: Ծրագիրը Հայաստանում իրականացվում է «Երիտասարդական համագործակցության կենտրոն» կրթական հասարակական կազմակերպության հետ համագործակցությամբ։

Կլոր սեղանի շրջանակներում Հայաստանում գտնվող առաքելության անդամները ներկայացրեցին իրենց գործունեության ուղղվածությունը,  քննարկելով և քննադատելով 44-օրյա պատերազմի ընթացքում Ադրբեջանի կողմից մարդու իրավունքներն ոտնահարող բոլոր անթույլատրելի դեպքերը:

MAAT հիմնադրամի նախագահ Այման Օքեյլը նշեց. «Մեր լեզուն մարդու, խաղաղության լեզուն է, նրանցը՝ մարդասպանության»:

MAAT հիմնադրամը 2016 թվականից ՄԱԿ-ի տնտեսական և սոցիալական խորհրդում ունի հատուկ խորհրդատվական մարմնի կարգավիճակ:

Դեռևսը 2021 թվականի հունվարին Maat-ը կոչ արեց Ադրբեջանին վերադարձնել հայ ռազմագերիներին՝ նշելով որ 44-օրյա պատերազմի ընթացքում ադրբեջանական կողմը պարբերաբար խախտել է միջազգային հումանիտար իրավունքը` մարդկության դեմ հանցագործություններ և ռազմական զանազան գործողություններ կատարելով։

MAAT-ի ղեկավար Այման Օքեյլն իր խորը մտահոգություն էր հայտնել Ադրբեջանի կառավարության կողմից իրենց պարտավորությունների կատարման բացակայության և հայ ռազմագերիներին չհանձնելու կապակցությամբ:

2021 թվականի ապրիլի 22-29-ը MAAT–ը խաղաղասիրական մշտադիտարկման շրջանակում հայաստանյան այցելության շրջանակներում նախատեսում է հանդիպումներ կազմակերպել հակամարտությունից տուժած մարդկանց, պետական մարմինների և քաղաքացիական հասարակության ներկայացուցիչների, նախաձեռնող խմբերի հետ,  որի արդյունքում  էլ կազմվելու է զեկույց և ներկայացվելու ՄԱԿ-ի մարդու իրավունքների մարմիններին։

Հայաստան ժամանած աաքելության  անդամները իրավաբաններ, խաղաղարարներից, քաղաքացիական հասարակության աշխատողներ են:

Կլոր-սեղանի քննարկման թեմաներից էր նաև արմենաֆոբիան, որի մասին առավել մանրամասն ներկայացրեց միջազգային իրավունքի փորձագետ Արա Ղազարյանը, ով բարձրաձայնեց նաև Ադրբեջանի կողմից լայնորեն կիրառվող  ատելության խոսքի և պատերազմական հանցագործությունների դեպքերը, որոնք, ցավոք, բազմաթիվ են:

Ազգագրական պարերի մասնագետ, հասարակական գործիչ Գագիկ Գինոսյանը, ով նաև արցախյան պատերազմների մասնակից է, խոսեց այն մասին, որ աշխարհում խոսում եմ մարդու խախտված իրավունքներից, սակայն չեն խոսում ազգի խախտված իրավունքներից:

Հրավիրվածների շարքում կային նաև Արցախի բնակիչներ (ովքեր կորցրել են իրենց ամեն ինչ), զոհվածների հարազատներ, հոգեբաններ, հասարակական կառույցների ներկայացուցիչներ, ովքեր հանգամանալից ներկայացրեցին պատերազմի օրերին և մինչ օրս իրենց կողմից տարվող աշխատանքները: