Բացել լրահոսը Փակել լրահոսը
172513893_10158308882368693_9190355970898266960_n
A A
Պաշտոնական

Զինծառայողների ապահովագրության հիմնադրամի տնօրենը վայր է դնում լիազորությունները

Զինծառայողների ապահովագրության հիմնադրամի տնօրեն Վարուժան Ավետիքյանը հրաժարականի դիմում է ներկայացրել։ Այս մասին Ավետիքյանը հայտնել է ֆեյսբուքյան գրառմամբ։

Նման որոշում ընդունելը պայմանավորված է հիմնադրամի առջեւ ծառացած նոր մարտահրավերներով եւ ըստ Ավետիքյանի՝ այն պետք է ղեկավարվի ոչ թե հասարակական հիմունքներով աշխատող տնօրենը, այլ լրիվ դրույքով աշխատող տնօրենը:

«Հիմնադրամը ձեւավորվեց 2017 թվականին` Կենտրոնական բանկի կողմից ու հովանու ներքո: Մինչեւ վերջերս հիմնականում Կենտրոնական բանկի կամավորական աշխատակազմն էր անձնվեր կերպով ծառայում Հիմնադրամին, իսկ կառույցը հոգ էր տանում, որպեսզի գործառույթներն իրականացվեն պատշաճորեն` ժամանակների հրամայականին համահունչ:

Վերջին պատերազմն ու դրա արդյունքները ցավալիորեն փոխեցին շատ բան:

Ժամանակն է, որ հիմնադրամն անցնի տրանսֆորմացիայի փուլ: Այժմ դրա ճանապարհին ենք: Մասնավորապես, վերջին ամիսներին Կենտրոնական բանկի ֆինանսավորմամբ մենք ձեւավորել ենք նվիրված ու պրոֆեսիոնալ աշխատակազմ, որը գործում է այն գիտակցությամբ, որ իր աշխատանքը կենսական է հայր, որդի կամ ամուսին կորցրած ընտանիքների կամ հաշմանդամություն ստացած զինծառայողների համար: Անցնող ամիսներին եւս Կենտրոնական բանկի ֆինանսական աջակցությամբ մենք ներդրումներ ենք արել եւ շարունակում ենք կատարել Հիմնադրամի ենթակառուցվածքների, ինչպես նաեւ ծրագրային ու ՏՏ համակարգերի մեջ` վստահ լինելու համար, որ որեւէ պայմանում դրանք պատշաճորեն ու անխափան կսպասարկեն մեր շահառուներին:

Հայտնում եմ նաեւ, որ թշնամու կողմից սանձազերծված վերջին պատերազմից հետո Հիմնադրամն այս պահին հատուցումներ է կատարում.

- 1939 զոհված զինծառայողների ընտանիքների

- 265 ծանր վիրավորում ստացած զինծառայողների

- 1055 անհետ կորած զինծառայողների ընտանիքների

Վերջին պատերազմից ի վեր հիմնադրամը կարողացել է 8 միլիարդ դրամից ավելի նվիրաբերություններ հավաքագրել ավելի քան 40 երկրների մեր հայրենակիցներից ու կազմակերպություններից:

Ամփոփելով անցյալը եւ չորս տարի շարունակ ղեկավարելով Հիմնադրամն ու առերեսվելով ծառացած մարտահրավերների հետ՝ գիտակցում եմ, որ ամեն օր նոր բան եմ սովորել եւ ձգտել եմ հմտություններս փոխանցել Հիմնադրամի կամավորներին, աշխատակիցներին, ընկերներին, գործընկերներին ու շահակիցներին: Վստահ եմ, որ կուտակված փորձառությունն ու գիտելիքներն ի սպաս են դրվելու Հիմնադրամի մարտահրավերների վրա օրնիբուն աշխատելու համար:

Առաջիկա օրերին մենք կհրապարակենք հիմնադրամի նոր գործադիր տնօրենի պաշտոնի մրցույթի վերաբերյալ հայտարարություն եւ կհրավիրենք մեր փորձառու հայրենակիցներին՝ մասնակցելու այդ մրցույթին: Հիմնադրամի խորհուրդը մանրամասն կուսումնասիրի ստացված դիմումները, եւ վստահ եմ, որ կկատարի արժանի ու ճիշտ ընտրություն: Մինչեւ նոր տնօրենի ընտրությունը ես կշարունակեմ կատարել պարտականություններս, այնուհետեւ կծառայեմ Հիմնադրամին այլ կարգավիճակով:

Մինչ այդ շնորհակալություն եմ հայտնում անցնող չորս տարիների ընթացքում մեր բոլոր կամավորներին, աշխատակիցներին, ընկերներին, գործընկերներին, հովանավորներին ու աջակիցներին, որոնք անվարան աջակցեցին Հիմնադրամին ու ինձ` ծառայելու հայրենիքին ու հայոց զինված ուժերին»,– ֆեյսբուքի իր էջում գրել է Վարուժան Ավետիքյանը։