Արցախի Հանրապետության հերոս, Հայաստանի Հանրապետության զինված ուժերի գեներալ-մայոր Արտուշ Թադևոսյանի  «Քաղաքացիական խորհուրդ» ՀԿ անդամներն ասուլիս էին հրավիրել

«Հենց այսօր էլ մենք «Քաղաքացիական խորհրդում» հյուրընկալելու ենք կառույցների, որոնք դեռ մինչ այս ծանր պահը ցանկություն էին հայտնել միանալու և մենք էլ այլ ուժերի միաբանման կողմնակիցն ենք և սա է ճանապարհն իրապես ազգային պետություն կերտելու և ստեղծված իրավիճակից դուրս գալու։ Քաղաքական կտակի ամբողջ իմաստը սա է, հորդորն է հանրությանը՝ համախմբվելու», - «Արցախի հերոս» Արկադի Տեր-Թադևոսյանի հիմնադրած «Քաղաքացիական խորհուրդ» ՀԿ-ի ասուլիսում ասաց խորհրդի անդամ Թաթուլ Մանասերյանը։

Նրա խոսքով՝ Սփյուռքում նույնպես կան կապեր և արդեն կազմակերպված կառույցներ։ «Քաղաքացիական խորհրդի» անդամների մեծ մասը ակտիվ կապեր ունեն սփյուռքում՝ սկսած Ռուսաստանի Դաշնության հայ համայնքից։ Կապեր կան ԱՄՆ-ի, եվրոպական երկրների հետ։ Կառույցներ էլ կան, որոնց դիրքորոշման մասին դեռևս տեղյակ չեն։

«Այս հանդիպումը նաև այդ իմաստն ունի, որ հայությունն ավելի ճանաչի։ Եթե Կոմանդոսի սխրանքը բոլորին հայտնի է, նաև իր քաղաքական պատգամը հասնի բոլորին և մենք կարողանանք այս ծանր օրերին միաբանվել, համախմբվել», - ասաց Թաթուլ Մանասերյանը։

Նա նշեց, որ Արկադի Տեր-Թադևոսյանի կերպարն ամենապատշաճն է, որպես հաղթանակի սիմվոլ, որ մեզ առաջնորդի դեպի ազգային պետության ձևավորում։

Հարցին, թե ինչպե՞ս էր Արկադի Տեր-Թաևոսյանն ընդունում Շուշիի հանձնման փաստը և խորհրդի կամ ընկերական շրջապատում ինչպե՞ս էր արտահայտվում, Մանասերյանը պատասխանեց՝ Կոմանդոսն այն բացառիկ հայորդիներից էր, որ շատ չէր խոսում, այդ թվում նաև տխուր փաստի մասին․

«Փոխարենը նա և՛ կոչ հնչեցրեց, որին բոլորս զինվորագրվեցինք, և՛ կատարեց առաջին քայլերը։ Ասում են՝ վշտից դուրս գալու լավագույն ձևը քայլ, գործողություն անելն է, և այս պարագայում, Կոմանդոսի ձեռնարկածը լավագույն օրինակն է, որ Շուշիի վերաազատագրումը լրիվ իրատեսական է», - ասաց նա։

Նրա խոսքով՝ Կոմանդոսի հետ առանձնազրույցներ էլ են ունեցել և ռազմական ազատագրումից բացի կան նաև այլ տարբերակներ, սակայն դրա համար համախմբվածություն և միաբանություն է պետք․

«Մոտ ժամանակներս մենք արդեն ծրագրով կներկայանանք հանրությանը, բայց կառուցվածքային առումով կայացել է «Քաղաքացիական խորհուրդը» և գործում են 12 հանձնախմբեր, որոնցից յուրաքանչյուրն իր ռեսուրսները մոբիլիզացրել է և այս զորաշարժը շարունակվելու է», - ասաց Թաթուլ Մանասերյանը։

Նոր մշակույթ, նրա կարծիքով, պետք է ձևավորել ոչ թե անձանց շուրջ, այլ գաղափարի, թիմային աշխատանքի և իրենց դա հաջողվել է։

Հիշեցնենք, որ մարտի 31-ին 82 տարեկանում կյանքից հեռացել է «Քաղաքացիական խորհուրդ» ՀԿ-ի հիմնադիր Արկադի Տեր-Թադևոսյանը՝ Կոմանդոսը: