«Ցավով պետք է արձանագրենք, որ երկու տարուց ավելի պետք եղավ, որ արձանագրվի այն, ինչ իրավաբանների մեծ մասի համար ակնհայտ էր ամենասկզբից։ Մենք շատ երկար ճանապարհ անցանք մինչև այս որոշումը», - ասում է ՀՀ երկրորդ նախագահ Ռոբերտ Քոչարյանի փաստաբան Հայկ Ալումյանը։

Ուրբաթ օրը Սահմանադրական դատարանը հակասահմանադրական էր ճանաչել Քրեական օրենսգրքի 300․1 հոդվածը, որով Ռոբերտ Քոչարյանը մեղադրվում էր սահմանադրական կարգը տապալելու մեջ։ Ըստ փաստաբանի՝ շատ տարբեր ատյաններում է այս հարցը քննարկվել։

Նրա խոսքով՝ խելացի, կրթված և իր ոլորտում պրոֆեսիոնալ մարդը, եթե անգամ չգիտի այս բանավեճի մեջ ով է ճիշտ, արդյոք իրոք 300․1 հոդվածը համապատասխանում է Սահմանադրությանը, Սահմանադրական դատարանի որոշումից հետո կհասկանա, որ եթե այդ ոլորտի մասնագետն ասում է՝ չի համապատասխանում, ապա վերջ․

«Տգետ մարդիկ իրավաբան չլինելով էլ կարող են ասել՝ Սահմանադրական դատարանն էլ էր սխալ, Եվրոպական դատարանի Մեծ պալատն էլ էր սխալ, Վենետիկի հանձնաժողովն էլ էր սխալ», - ասաց փաստաբանը։

Հայկ Ալումյանի խոսքով՝ օրենքով ՍԴ որոշումը հենց այսօր մտնում է ուժի մեջ, հետևաբար դատարանը այսօր պետք է հրատապ նիստ հրավիրի և հենց այսօր դադարեցնի քրեական հետապնդումը և՛ Ռոբերտ Քոչարյանի, և՛ մյուս երեք մեղադրյալների նկատմամբ․

«Համապատասխան միջնորդությունները ներկայացված են, թեև միջնորդություններն էլ եթե ներկայացված չլինեին, դատարանը պիտի դա աներ։ Եթե դատարանն էլ չէր շտապում անել, հենց մեղադրող կողմը պարտավոր է միջնորդել դատական նիստի հրատապ կայանալու համար և հրաժարվել մեղադրանքից։ Մենք չենք սպասել, որ մեղադրողները և դատարանը դա կանեն։ Ընդ որում, օրենքը նախատեսում է, որ քրեական հետապնդումը իրականացնող մարմինը, այս դեպքում՝ Հատուկ քննչական ծառայությունը և դատախազությունը, պարտավոր է գրավոր հայցել ներողություն այն անձից, ում անհիմն հետապնդել է», - նշեց փաստաբանը։

Նա ասաց, որ միջնորդություն են ներկայացրել նաև խափանման միջոցը վերացնելու վերաբերյալ։ Եթե դատարանն, այնուամենայնիվ, գտնի, որ խափանման միջոց պետք է շարունակի կիրառել, քանի որ կա մեկ այլ մեղադրանք, ապա պետք է զգալիորեն նվազի գրավի չափը։

Ռոբերտ Քոչարյանը մեղադրվում է նաև առանձնապես խոշոր չափերով կաշառք ստանալու մեջ ։

«Կան քննիչներ, որ եթե տեսնում են իրենց մեղադրանքը թույլ է, կողքից մեկ այլ մեղադրանք են ստեղծում, մտածում են՝ կուղարկեմ դատարան, եթե մեկով արդարացնեն, մյուսով գոնե մեղավոր կճանաչեն։ Այդպես էր կաշառքի վերաբերյալ մեղադրանքը», - ասաց փաստաբանը։

Երկրորդ նախագահ Ռոբերտ Քոչարյանի հետ, Հայկ Ալումյանի խոսքով, հանդիպել են, քննարկել են ՍԴ որոշումը, դրանից բխող գործողությունները։ Նրա խոսքով՝ Քոչարյանի տրամադրության մեջ փոփոխություններ չի նկատել, անգամ երբ իրեն կալանավորում էին, ազատում էին կալանքից, երբ կալանքի տակ էր և խնդիրներ էին առաջացել իր մոտ։