Հորդորում եմ տիկին Զոհրաբյանին ապատեղեկատվություն չտարածել բարձր ամբիոնից․ Ռուստամ Բադասյան

Արդարադատության նախարար Ռուստամ Բադասյանը Ֆեյսբուքի իր էջում գրում է․

««Բարգավաճ Հայաստան» խմբակցության անդամ Նաիրա Զոհրաբյանն այսօր Ազգային ժողովի ամբիոնից հայտարարեց, որ քրեակատարողական հիմնարկների դատապարտյալների հարազատներից ահազանգեր է ստանում, որ «Դատապարտյալների հիվանդանոց»-ի փոխտնօրեն Սմբատ Բուլղադարյանը, «Նուբարաշեն»-ից Գևորգ Վարոսյանը, «Նուբարաշեն»-ի, «Արմավիր» ՔԿՀ-ների ռեժիմի տարբեր աշխատակիցներ հանդիպում են դատապարտյալներին, կալանավորներին և ասում են՝ «գիտեք չէ՞՝ ում պետք է ընտրեք, չընտրեցիք՝ խնդիրներ կունենաք»։

Չեմ անդրադառնա կարճ հայտարարության մեջ արված մի քանի սխալ տեղեկություններին, ընդամենը ներկայացնեմ մեկ փաստ, որը կհերքի տիկին Զոհրաբյանի ահազանգով բարձրացված խնդրի իրական լինելը։ Հնչեցվեց, որ Գևորգ Վարոսյանը, ով, ի դեպ, ոչ թե «Նուբարաշեն» ՔԿՀ-ի, այլ «Արմավիր» ՔԿՀ-ի Օպերատիվ բաժնի պետն է, ևս նման հարցով է դիմել դատապարտված և կալանավորված անձանց։

Տիկի՛ն Զոհրաբյան, Հայաստանում արտահերթ խորհրդարանական ընտրություններ անցկացնելու հայտարարությունն արվել է օրեր առաջ՝ մարտի 18-ին, իսկ պարոն Վարոսյանը 2021 թվականի հունվարի 21-ից մինչև փետրվարի 5-ը, այնուհետև, փետրվարի 9-ից մինչև մարտի 11-ը գտնվել է արձակուրդում, իսկ մարտի 12-ից առ այսօր՝ ժամանակավոր անաշխատունակության մեջ է, հետևապես, բացակայում է հնարավորությունը, որ արտահերթ խորհրդարանական ընտրություններ անցկացնելու հայտարարությունից հետո շփում ունենար ՔԿՀ-ում պահվող անձանց հետ։

Տիկին Զոհրաբյանին հորդորում եմ ինձ տրամադրել ահազանգի աղբյուրների վերաբերյալ տեղեկություններ։ Վստահեցնում եմ, որ նման արատավոր երևույթների կանխարգելումը, բացահայտումն ու դրանց պատշաճ իրավական գնահատական տալու առաջին շահագրգիռ կողմը ես եմ»։