Միջազգային կառույցների ներկայացուցիչները հրաժարվել են գալ ԱԺ՝ անվտանգության նկատառումներից ելնելով (տեսանյութ)
Աջակցիր «Ա1+»-ին«Անհայտ կորած անձանց մասին» օրենքի նախագծի վերաբերյալ Ազգային ժողովում այսօրվա քննարկմանը միջազգային կառույցների ներկայացուցիչները հրաժարվել էին ներկայանալ՝ անվտանգության նկատառումներով, այդ մասին ասաց «Իմ քայլը» խմբակցության պատգամավոր Նազելի Բաղդասարյանը․
«Պետք է նշենք, որ, ամեն դեպքում, Ազգային ժողովն իր բնականոն գործունեությունը շարունակում է, մենք աշխատում ենք նորմալ աշխատանքային ռեժիմով։ Այսօրվա քննարկմանը հրավերներ ենք ուղղել քննչական մարմիններին, ԱԱԾ-ին, գործադիր մարմինների ներկայացուցիչներին, Մարդու իրավունքների եվրոպական դատարանի և ՄԻՊ-ի գրասենյակներին», - ասաց նա։
Նա նշեց, որ պատերազմից հետո ստեղծված իրավիճակով պայմանավորված է անհրաժեշտություն առաջացել փոփոխել պետական քաղաքականությունը և մոտեցումները, բայց կարիք եղել է դեռ մի քանի տարի առաջ արդեն։
«2007-2008 թթ. փորձ է կատարվել օրենքը դնել շրջանառության մեջ, բայց խոչընդոտներ են ծագել, որոշ գերատեսչություններ անգամ 2011թ. այն համարել են ժամանակավրեպ կամ հիմնավորել են, որ օրենքի կարգավորման առարկայի հետ կապված խնդիրներ կային: Այժմ պետք է հստակեցվի անհայտ կորած անձանց իրավական կարգավիճակը»,- ասաց Նազելի Բաղդասարյանը:
Քանի որ օրինագիծը դեռ սաղմնային փուլում է, նրա խոսքով, նպատակ ունեն լրամշակումներ անելու։ Նախագիծը դեռ շրջանառության մեջ դրված չէ և բոլոր այն շահագրգիռ անձինք, որ կցանկանան որևէ օգուտ տալ, իրենց առաջարկություններով հանդես գալ, իրենք, ըստ նրա, իրապես բաց են ընդունելու։
