Նիկոլ Փաշինյանի հրաժարականը պահանջող քաղաքացիները ժամը 15-ից Ազատության հրապարակում էին։ Այնտեղ էին Ազգային ժողովի մի շարք պատգամավորներ, տարբեր կուսակցությունների և խմբակցությունների անդամներ։ Ազատության հրապարակում և հարակից տարածքում ոստիկանական բազմաթիվ խմբեր և մեքենաներ էին կուտակված,  թեեւ իրավիճակը համեմատաբար հանգիստ էր։

ԲՀԿ անդամ Միքայել Մելքումյանը ելույթ ունեցավ և ասաց, որ այսօր 18։00-ին ԲՀԿ-ի եւ ԼՀԿ-ի նախաձեռնությամբ Ազգային ժողովի արտահերթ նիստ է հրավիրվել, որպեսզի քննարկեն ռազմական դրության չեղարկումը և ստեղծված իրավիճակի հանգուցալուծումը։

ՀՅԴ գերագույն մարմնի ներկայացուցիչ Իշխան Սաղաթելյանը կոչ արեց Ազատության Հրապարակում հավաքված քաղաքացիներին քայլերթով գնալ դեպի Բաղրամյան պողոտա՝ մինչև Ազգային ժողովի շենք։  Նա նշեց, որ այնտեղ կհայտնեն իրենց պահանջը և նորից կվերադառնան Ազատության հրապարակ։

Ավելի վաղ ելույթի ընթացքում «Հայրենիքի փրկության շարժման» վարչապետի թեկնածու Վազգեն Մանուկյանը դիմել էր ժողովրդին․

«Ավարտվում է այն փուլը, որ մենք Նիկոլ Փաշինյանին դուրս կշպրտենք և սկսվում է երկրորդ փուլը՝ վերականգնել մեր հայրենիքը։ Ինչպես միասնական էինք առաջին փուլում, միասնական պետք է լինենք նաև երկիրը վերակառուցելու, արդար և հզոր Հայաստան դարձնելու գործում»։

Քաղաքական գործիչներից բացի Ազատության հրապարակում էր նաև «Իզմիրլյան բժշկական կենտրոնի» տնօրեն Արմեն Չարչյանը․

«Բժիշկները միշտ եղել են բանակի և պետության կողքին։ Բժիշկները ապաքաղաքական տարրեր են, նրանք բարձր են, շատ ավելի բարձր են ցանկացած քաղաքականությունից, բայց դա չի նշանակում, որ մենք չենք ունեցել և չունենք քաղաքացիական դիրքորոշում»։

Քաղաքացիները շարժվեցին Բաղրամյան պողոտա։