Հայաստանի հավաքականը 99-րդն է ՖԻՖԱ-ի վարկանիշային աղյուսակում
Աջակցիր «Ա1+»-ինՖուտբոլի միջազգային ֆեդերացիան՝ ՖԻՖԱ-ն, այսօր հրապարակել է ազգային հավաքականների վարկանիշային նոր աղյուսակը։
Հայաստանի հավաքականը, որն անցած մեկ ամսում ՈՒԵՖԱ Ազգերի լիգայի շրջանակում հաղթել է Վրաստանի և Հյուսիսային Մակեդոնիայի ազգային թիմերին, այդ աղյուսակում առաջադիմել է երկու աստիճանով և այժմ զբաղեցնում է 99-րդ հորիզոնականը։ Դա նշանակում է, որ մեր ընտրանին տարին կփակի առաջին հարյուրակում:
Ամենամեծ առաջընթաց ունեցել է Հունգարիան, որը 47-րդ տեղից բարձրացել է 40-րդ հորիզոնական: Բանն այն է, որ հունգարացիներն ոչ միայն 1-ին տեղն են զբաղեցրել Ազգերի լիգայի իրենց խմբում, այլև նվաճել են Եվրո-2020-ի վերջին չորս ուղեգրերից մեկը:
Վարկանիշային աղյուսակը շարունակում է գլխավորել Բելգիայի հավաքականը: Նրան հաջորդում են Ֆրանսիան ու Բրազիլիան: Առաջին տասնյակում միանգամից երկու փոփոխություն է տեղի ունեցել: Նախկինում 9-րդ և 10-րդ տեղերում գտնվող Խորվաթիային ու Կոլումբիային փոխարինել են համապատասխանաբար Մեքսիկայի և Իտալիայի հավաքականները:
Առաջին տասնյակ.
1․ Բելգիա՝ 1780 միավոր
2․ Ֆրանսիա՝ 1755
3․ Բրազիլիա՝ 1743
4․ Անգլիա՝ 1670
5․ Պորտուգալիա՝ 1662
6․ Իսպանիա՝ 1645
7․ Արգենտինա՝ 1642
8․ Ուրուգվայ՝ 1639
9․ Մեքսիկա՝ 1632
10․ Իտալիա՝ 1625