Ինչ վերաբերում է թուրքական F-16 բազմաֆունկցիոնալ ինքնաթիռների ներգրավվածությանը մարտական գործողություններին, ապա դրանք, բանախոսի հավաստմամբ, Ադրբեջանում հայտնվել են դեռևս հուլիս ամսին՝ թուրք-ադրբեջանական լայնամասշտաբ զորավարժությունների նախապատրաստման նախօրեին․

 

«Այդ ինքնաթիռները ակտիվ ուսումնամարզական, ուսումնամարտական թռիչքներ են իրականացրել ՀՀ և ԱՀ պետական սահմանի ամբողջ երկայնքով՝ հիմնականում թիրախավորելով Գյանջա-Վարդենիս, Գյանջա-Քարվաճառ, Գյանջա-Մարտակերտ, Ստեփանակերտ և Հադրութ ուղղությունները։ Զորավարժությունների ավարտից հետո այդ ինքնաթիռները Թուրքիայի տարածք չեն վերադարձել, մնացել են տեղակայված Գյանջայի օդանավակայանում: Ընդ որում, պետք է նշեմ, որ F-16-երի վերաթռիչքները դեպի Ադրբեջան իրականացվել են Վրաստանի տարածքով», - ասաց Գարիկ Մովսեսյանը:

 

Բանախոսը ներկայցրեց մի շարք փաստեր, որոնք վկայում են, որ թուրքական ինքնաթիռները մասնակեցել են ռազմակն գործողություններին։ Մովսեսյանը վստահեցնում է նաև, որ Ադրբեջանի զինանոցում կան և կիրառվել են թուրքական և իսրայելական արտադրության ԱԹՍ-ներ․

 

«Դրանք հիմնականում թուրքական «Բայրաքտարներն» են, որոնք կարող են երկար ժամանակ մնալ օդում, վարել ակտիվ հետախուզություն և ուղղորդել կրակային միջոցներին: Միաժամանակ, սուտ է այն տեղեկությունը, որ ՀՀ տարածքին հարվածներ չեն հասցվել: Առաջին իսկ օրվանից հակառակորդը հրթիռային հարվածներ է հասցրել Գեղարքունիքի մարզի Վարդենիս քաղաքին և մերձակա բնակավայրերին, հետագա օրերին նաև Սյունիքի մարզի ուղղությամբ, որի հետևանքով ունենք վիրավորներ և զոհեր», - ասաց բանախոսը:

 

Հակաօդային պաշտպանության զորքերի պետի տեղակալ-շտաբի պետը հավելեց նաև, որ 18 օր շարունակվող մարտական գործողությունների ընթացքում հայկական կողմը խոցել է հակառակորդի ավելի քան 180 օդային հարձակման միջոց, այդ թվում 15 ինքնաթիռ, 8 ուղղաթիռ, մնացածը տարբեր բնույթի անօդաչու թռչող սարքեր են։