Պայուսակի գինը ուսուցչուհուն դրդեց սեփական բիզնեսը սկսել
Աջակցիր «Ա1+»-ինՇուկայում ձեռագործ պայուսակների գները դարձան պատճառ, որ 34 -ամյա Մարգարիտա Հովակիմյանը զբաղվի նոր գործով։ 10 տարվա աշխատանքային փորձով կերպարվեստի ու տեխնոլոգիայի ուսուցչուհին մի քանի ամիս առաջ որոշում է իր զգեստապահարանում ունենալ ձեռագործ պայուսակ։ Ասում է՝ գներն այնպիսին էին, որ հաշվարկեց՝ այդ գումարով մի քանիսը կարող է գործել:
«Հետաքրքրվեցի, գտա անհրաժեշտ պարագաներն ու սկսեցի գործել։ Առաջինն ինձ համար էի գործել, պատրաստվում էի մյուսը ընկերուհուս համար գործել, բայց շատերը հավանեցին ու գնելու ցանկություն հայտնեցին , իսկ ես շատ ոգևերվեցի ու որոշեցի սեփական պայուսակների արտադրությամբ զբաղվել»,- մեզ հետ զրույցում պատմում է Մարգարիտան։
Կարճ ժամանակում Մարգարիտայի փոքրիկ բիզնեսն ընկերների շնորհիվ լայն տարածում է ստացել ու արդեն անգամ ԱՄՆ-ից է պատվերներ ստացել:
«Շատ դրական կարծիքներ եմ ստանում, գրում են, որ ճաշակով է արված, ինչն ինձ ավելի է ոգևորում։ Յուրաքանչյուր աշխատանք մայրիկիս եմ առաջինը ցույց տալիս, քանի որ իր կարծիքն ինձ համար շատ կարևոր է։ Միասին քննարկում ենք ու ստանում վերջնարդյունքը»,- ասում է նա։
Մեկ ամսում ուսուցչուհին հասցրել է արդեն վաճառել 7 պայուսակ՝ շուկայական գներից մոտավորապես 50% մատչելի գնով։
«Երազում եմ փոքիկ խանութ ունենալ, որտեղ կվաճառվեն իմ ձեռագործ ապրանքները, որոնք անսահման սիրով եմ պատրաստում»,- «Ա1+»-ի հետ զրույցում անկեղծանում է Մարգարիտան:
Նա պատմում է, որ փոքր տարիքում հելյունով գործել իրեն սովորեցրել է տատիկը:
«90-ականներին , երբ հոսանք չկար, ցուրտ էր, գուլպաներ էի գործում, իմ ձեռքով տուփ պատրաստում ու նվիրում»,- ասում է նա։
