Բացել լրահոսը Փակել լրահոսը
A A
Տեսանյութեր Քաղաքականություն

«Սա չի նշանակում, որ քաղաքում շրջելու են զինված մարդիկ». ովքեր կընդգրկվեն Աշխարհազորում (տեսանյութ)

«Աշխարհազորի ստեղծումը չի ենթադրում, որ քաղաքում կամ բնակավայրում շրջելու են զինված մարդիկ»։ Այս մասին այսօր հրավիրված մամուլի ասուլիսում ասաց ՀՀ պաշտպանության նախարարի տեղակալ Գաբրիել Բալայանը:

Նրա խոսքով՝ նախագծի ընդունման դեպքում համապատասխան ներգրավումը տեղի է ունենալու բացառապես մարտական գործողությունների, ռազմական անմիջական սպառնալիքի առկայության դեպքում․

«Զենքը բաժանվելու է աշխարհազորում կցագրված քաղաքացիներին միայն այն պարագայում, երբ մարտական գործողություններ են սկսվում կոնկրետ բնակավայրում, կամ դրա սպառնալիք է առաջանում: Սա չի նշանակում, որ քաղաքում շրջելու են զինված մարդիկ»,- ասաց Բալայանը:

Զենքի ստացումը, ըստ Բալայանի, ինքնանպատակ չի լինելու, աշխարհազորայիններին զենք տրամադրվելու է ըստ անհրաժեշտության։ Բալայանը փոխանցեց, որ աշխարհազորում նախատեսում են կցագրել մինչև 70 տարեկան անձանց, որոնց հետ պարբերաբար որոշակի վարժանքներ են իրականացվելու, իսկ զորակոչվելուց հետ ստանալու են զինծառայողի կարգավիճակ:

Դրանից հետո քաղաքացիներն ու նրանց ընտանիքի անդամներն օգտվելու են համապատասխան սոցիալական երաշխիքներից: Նրա խոսքով՝ աշխարհազորում ներգրավված կլինեն նաև կանայք, և այս առումով որևէ խտրականություն չի լինելու․

«Նախատեսում ենք, որ կանայք էլ կներգրավվեն աշխարhազորում։ Ճիշտ է, առաջին փուլում մարտական գործողություններին չեն մասնակցի»։

Ինչ վերաբերում է ԵԿՄ-ի հետ համեմատականին և տարածված լուրերին, թե ԵԿՄ դժգոհ է այս նախագծից, Բալայնանն ասաց՝ ԵԿՄ-ն հասարակական կազմակերպություն է, և մեկը մյուսին կարող են փոխլրացնող լինել, ոչ թե խանգարող։ Հարցին, թե ինչու որոշվեց աշխարհազոր ստեղծել, ի՞նչն է փոխվել, փոխնախարարը նշեց, որ շատ բան է փոխվել` գործընթացները տարածաշրջանում, պաշտպանության մեր գաղափարը, հնարավորությունները:

Գաբրիել Բալայանը շեշտեց, որ աշխարհազորի առաջարկվող մոդելը զուտ հայկական է, չնայած այլ երկրների փորձը, իհարկե, ուսումնասիրված է: Նախագծի համաձայն` մարտական գործողությունների դեպքում հրամանատարներ են դառնում համայնքների ղեկավարների եւ մարզպետերի տեղակալները: Նախատեսվում է, որ այդ պաշտոնները կզբաղեցնեն պաշտոնաթող զինվորականները: