«Տեր- Պետրոսյանի մոտ առաջընթաց կա» (տեսանյութ)

Աջակցիր «Ա1+»-ին

Լեւոն Տեր-Պետրոսյանի երեկվա ելույթն այսօր խորհրդարանի միջանցքներում քննարկման առարկա էր:

ՀՀԿ-ական  պատգամավոր Վազգեն Կարախանյանը պատասխանեց «Ա1+»-ի հարցերին:

-Ինձ համար նորություն է այդ լեզվամտածողությունը, նման որակումներով մի նախագահից գործող նախագահին որակումներ տալը, Լեւոն Տեր-Պետրոսյանի մոտ բավականին առաջընթաց կա, որ անցել է վուլգար խոսակցալեզվին եւ արդեն գողական տերմիններ է օգտագործում: Եթե այսպես գնա, ժամանակն ու տարածությունը նրան տանելու է մի ուրիշ աշխարհ:

-Բայց նա ընդամենը ցիտում էր «իշխանական վերխուշկայում» ընդունված խոսակցական լեզուն, որ նրանց համար էլ պարզ լինի իր ասելիքը, քանի որ ըստ Տեր-Պետրոսյանի նրանք չեն հասկանում այլ լեզուներ, այդ թվում մայրենին:

 -Ինձ համար անհասկանալի է այդ մոտեցումը,որովհետեւ ես առիթներ ունեցել եմ խոսելու գործող նախագահ Սերժ Սարգսյանի հետ, եւ պիտի հիասթափեցնել Լեւոն Տեր-Պետրոսյանին, նման լեզվամտածողություն ես իր կողմից չեմ տեսել: Ընդհակառակը, խոսքը գնում է հայեցի հոգեկերտվածքով տերմինների, բառակապակցությունների, ինչու չէ նաեւ արժեքների մասին:

-Երեկ մարդու իրավունքների միջազգային ֆորումը կարծես տեղափոխվել էր Մատենադարան, եւ օտարազգի իրավապաշտպանները պահանջում էին քաղբանտարկյալների ազատ արձակում: Դուք ինչպե՞ս եք վերաբերում նրան, որ մինչ հանրապետական պատգամավարները հանգիստ նստում են իրենց տներում կամ խորհրդարանի դահլիճում, իրենց գործընկեր Սասուն Միքայլեյանի ազատության համար պայքարում են օտարները:

 -Ակամայից հիշեցի պատմության որոշ դրվագներ, երբ նույն սեւամորթ իրավապաշտպանի պապերի օրոք, 1915 թվականին ցեղասպանություն տեղի ունեցավ, եւ նրանց պապերը ներողամտորեն ժպտում էին եւ ինչ-որ տեղ հավանություն տալիս: Չեմ կարծում, որ նրանք մեզ պետք է դասեր տան: Եվ բացի այդ մեր երկրում, անկախ Հայաստանում քաղբանտարկյալներ չկան: Եթե մարդը դժգոհ է ռեժիմից, տվյալ իշխանությունից, նրա վարքագծից' չեմ կարծում, որ նրան պետք է որակել քաղբանտարկյալ: Քաղբանտարկյալ ես եմ եղել, իմ ընկերները Սովետական կայսերության օրոք, երբ մի բան ենք ուզել'Աստծո կողմից տված իրավունքը, ազատ ու անկախ Հայաստանի կերտում:

-Իսկ ձեր կարծիքով Սասուն Միքայելյանի ուզածն այսօր այդ չի՞:

 -Ես կարծում եմ, Սասուն Միքայելյանը հայ տղա է, բայց որպես քաղբանտարկյալ չեմ ընդունում:

-Այսինքն, հանցագո՞րծ է:

-Դատարանն է որոշել, ես չեմ որոշել: Ինձ դժվար է Սասունին գնահատականներ տալը, որովհետեւի անձնական հարաբերություններ եմ ունեցել հետը, բայց երբ ինքը ընտրություն էր կատարում'ինձ չի հարցրել, երբ ռեժիմի դեմ, իշխանության դեմ կռիվ ուներ' ինձ չի հարցրել: Ավելին, բազմաթիվ անգամ հարցրել եմ, ինքն ասել է' ինձ ինչի տեղ ես դրել, իմ ընկեր, ես ոնց կարող եմ, ես Սերժ Սարգսյանի հետ խրամատներից աճել, մեծացել հասել եմ այստեղ, ես ոնց կարող եմ սուր վերցնել նրա դեմ:

-Այսինքն, ընդունո՞ւմ եք, որ Սասուն Միքայելյանը ռեժիմի դեմ պայքարի արդյունքում  հայտնվել մեկուսարանում:

-Ես կարծում եմ իշխանության հետ կապված խնդիր է: Չեմ կարծում,թ ե Հայաստանում ռեժիմ է փոխվելու , ուղղակի անձերի փոփոխության խնդիր են դնում: Կարծում են, թե որ իրենք լինեն, ավելի ճիշտ, արդար երկիր կունենանք:

-Բայց ինքը իշխանության մեջ էր, չէ՞:

 -Երեւի ինչ-որ մի տեղ իրեն այդ աստիճանակարգը չի բավարարել: Հնարավոր է, որ ինչ-որ չինովնիկ, պաշտոնյա իրեն նեղացրել է, կարծում եմ խնդիրն այստեղ է: Սասուն Միքայելյանը չի ելել գաղափարաքարոզչական մի երեւույթի համար, կամ այդ արժեքները պահպանելու համար, իսկ մեր համագումարում նա հանդես եկավ որպես «Ոգու փորձության» ղեկավար անդամ եւ պաշտպանեց Սերժ Սարգսյանի թեկնածությունը նախագահական ընտրություններում:

-Բայց այնուամենայնիվ, երբ օտարազգի իրավապաշտպաններն են մեր երկրում մեր քաղբանտարկյալների պաշտպանությամբ հանդես գալիս, դա մեր երկրի պատվին դեմ չի՞:

-Այդ իրավապաշտպանները պետք է մի բան անեին, ցեղասպանությունը ճանաչեին, իսկ իրենք մի խնդիր են այսօր դնում, ինչքան թույլ Հայաստանը, այնքան լավ, դրա համար օգտագործում են բոլոր միջոցներ:

-Իսկ Հայաստանը ուժեղացնելու համար ճիշտ չէ՞ր լինի ազատ արձակել քաղբանտարկյալներին, որպեսզի հավելյալ լծակ չտայինք օտարներին:

 -Դուք հարցը տարբեր ենթատեքստերով եք տալիս, բայց ես նորից եմ ասում, չեմ գտնում, որ մենք քաղբանտարկյալներ ունենք, իսկ այն մարդիկ, ովքեր քրեական հանցագործություններ են արել, դատարանը պետք է պատիժներ սահմանի:

Զրուցեց Դիանա Մարկոսյանը