Վարչապետին փոխելու մասին և նոր վարչապետ ընտրելու մասին առաջինը խոսել եմ ես․ Արթուր Վանեցյան (տեսանյութ)
Աջակցիր «Ա1+»-ինԱյսօր ՀՀ Հատուկ քննչական ծառայություն էր այցելել «Հայրենիք» զարգացման հիմնադրամի հոգաբարձուների խորհրդի նախագահ, Ազգային անվտանգության ծառայության նախկին տնօրեն Արթուր Վանեցյանը։
Մինչև շենք մտնելը, Վանեցյանն ի պատասխան լրագրողի հարցին, հաստատեց, որ 2019 թվականի փետրվարին Հռոմում հանդիպել է Սուրբ Աթոռում (Վատիկան) նախկին դեսպան, ՀՀ երրորդ նախագահ Սերժ Սարգսյանի փեսա Միքայել Մինասյանի հետ։ «Ես գործել եմ բացառապես իմ պաշտոնեական լիազորությունների շրջանակում»,- նշել էր նա։
ՀՔԾ-ից դուրս գալուց հետո հասարակական գործիչը պատասխանեց լրագրողների հարցերին, այդ թվում՝ անդրադարձավ Մինասյանի հայտարարություններին, կապված հանդիպման բովանդակության հետ։
«Այդ հայտարարության հետ կապված, դուք գիտեք, որ Հատուկ քննչական ծառայությունում հարուցվել է քրեական գործ։ Եվ այդ գործի շրջանակներում իրականացվում է նախաքննություն։ Եվ ելնելով այդ հանգամանքից, և նախաքննության գաղտնիքը չբացահայտելու և չխախտելու նպատակով՝ ես չեմ կարող որևէ մեկնաբանություն տալ այս գործի հետ կապված»,- ընդգծեց Վանեցյանը։
ԱԱԾ նախկին տնօրենը, խոսելով նախկինում իր արած հայտարարության մասին, թե Մինասյանը պետք է օրենքի առջև դեռ շատ բաների համար պատասխան տա, նշեց, որ եթե իրավապահ մարմինները կկարողանան հիմնավորել Մինասյանի կամ առհասարակ ցանկացած այլ անձի մեղավորությունը, և դատարանը կճանաչի նրան մեղավոր, ուրեմն տվյալ մարդը մեղավոր է։
Լրագրողի հարցին՝ իր՝ ԱԱԾ տնօրեն եղած ժամանակ հանգամանքներ կա՞ն, որ ենթադրություն են տալիս, թե Մինասյանը պետք է պատասխանատվության ենթարկվի, պատասխանեց․
«Ես բազմիցս ասել եմ, որ Ազգային անվտանգության ծառայության տնօրեն աշխատած ժամանակահատվածի տվյալները ես երբեք չեմ հրապարակելու»։
Հարցին՝ ինչպե՞ս է ստացվում, որ Մինասյանի և իր ցանկությունները համընկան վարչապետի՝ կառավարության փոփոխության հարցում, պատասխանեց, որ վարչապետի հրաժարականի մասին առաջինը խոսել է ինքը, դեռևս հունվար ամսին։
«Եվ հիմա, երբ որ արդեն բոլորն են խոսում դրա մասին, կարող են զուգահեռներ անցկացնել։ Իսկ վարչապետին փոխելու մասին և նոր վարչապետ ընտրելու մասին առաջինը խոսել եմ ես»,- եզրափակեց Վանեցյանը և նստելով մեքենան հեռացավ։
Հիշեցնենք, որ Վանեցյանի և Մինասյանի միջև հանդիպման մասին առաջինը հայտարարել էր հենց Վանեցյանը տպագիր թերթերի գլխավոր խմբագիրների հետ հանդիպման ժամանակ այս տարվա փետրվարի 5-ին։ Հանդիպման տեսագրությունը լրատվամիջոցներում հրապարակվել էր հանդիպման հաջորդ օրը։ Վանեցյանը նշել էր, որ նախկին դեսպանի հետ հանդիպել է Փաշինյանի իմացությամբ։
Հանդիպման մանրամասների մասին արդեն խոսել էր Միքայել Մինասյանն այս տարվա մայիսի 2-ին իր «Ստի վերջը» տեսաշարի առաջին մասում։ Ըստ դեսպանի՝ Վանեցյանի միջոցով Փաշինյանն իրեն առաջարկել էր սիմվոլիկ գումար վճարել, Հայաստան չգալ, դառնալ ապաքաղաքական մարդ, սակայն Մինասյանը մերժել էր։
Մայիսի 16-ին իր մամուլի ասուլիսի ժամանակ վարչապետ Նիկոլ Փաշինյանը Մինասյանի հայտարարության վերաբերյալ ասել էր, որ դրանցով պետք է զբաղվեն իրավապահ մարմինները։
Վատիկանում Հայաստանի նախկին դեսպան Միքայել Մինասյանի տեսանյութի առթիվ նախապատրաստված նյութերի հիման վրա Հատուկ քննչական ծառայությունում (ՀՔԾ) մայիսի 13-ին հարուցվել էր քրեական գործ` ՀՀ քրեական օրենսգրքի 308-րդ հոդվածի 1-ին մասով (Պաշտոնատար անձի կողմից իր պաշտոնեական դիրքը ծառայության շահերին հակառակ օգտագործելը կամ ծառայողական պարտականությունները չկատարելը՝ շահադիտական, անձնական այլ շահագրգռվածությունից կամ խմբային շահերից ելնելով, որն էական վնաս է պատճառել անձանց, կազմակերպությունների իրավունքներին ու օրինական շահերին, հասարակության կամ պետության օրինական շահերին)։
Տեսանյութերը՝ «Ազատության» և «Ֆակտորի»