ԱՄՆ-ում վերսկսել է NASCAR հանրահայտ ավտոմրցավազքը
Աջակցիր «Ա1+»-ինԱՄՆ-ում անցկացվող NASCAR հանրահայտ ավտոմրցավազքը վերադարձավ մրցուղիներ: Երեկ Դարլինգտոնում կայացել է ընփացիկ մրցաշրջանի թվով 5-րդ փուլը:
Ինչպես հայտնում են ամերիկյան լրատվամիջոցները, այս փուլում առաջին տեղը գրավել է «Ստյուարդ-Հաաս Ռեյսինգ» թիմի ավտոարշավորդ Քևին Հարվիկը: Դա նրա թվով 50-րդ հաղթանակն է եղել այս մրցումներում:
Մրցանակային 2-րդ տեղը գրավել է «Հենրիկ Մոտորսպորտ» թիմի ներկայացուցիչ Ալեքս Բոումենը, իսկ 3-րդը՝ «Չիպ Ջանասի Ռեյսինգի» ավտոարշավորդ Կուրտ Բուշը:
Ընդհանուր հաշվարկով մրցավազքը 218 միավորով գլխավորում է Քևին Հարվիկը: Նրանից 28 միավոր ետ է մնում Ալեքս Բոումենը, իսկ երրորդ տեղում գտնվում է «Պենսկե Ռեյսինգ» թիմի մարզիկ Ջոուի Լոգանոն՝ 185 միավոր:
Մրցավազքի հաջորդ՝ 6-րդ փուլը, տեղի կունենա մայիսի 20-ին, դարձյալ Դարլինգտոնում: Մրցումներն առայժմ անցկացվում են առանց հանդիսականների:
Ինչ վերաբերում է «Ֆորմուլա 1» դասի ավտոմեքենաների աշխարհի առաջնությանը, ապա այս տարվա առաջին փուլի մեկնարկը նախատեսված է հունիսի 5-ին, Ավստրիայում: