Դատավորի աթոռին նստելն ակցիա չէր․ Հայկ Ալումյան (տեսանյութ)
Աջակցիր «Ա1+»-ինՌոբերտ Քոչարյանի փաստաբան Հայկ Ալումյանն այսօր լրագրողների հետ հանդիպման ժամանակ նշեց, որ իրենք դեռևս չունեն պատասխան, թե նախկին չորս վարչապետների անձնական երաշխավորության միջնորդությունը ե՞րբ կարող է քննվել: Նրա խոսքով՝ օրենքով սահմանված չէ դիմել Վերաքննիչ դատարան, բայց Եվրոպական կոնվենցիայի համաձայն, եթե անձի իրավունքի խախտումներեն առկա, ապա պետք է այն քննության առնել:
«Վերաքննիչ դատարան եմ դիմելու՝ բողոք եմ ներկայացնելու, որ Առաջին ատյանի իրավասության դատարանի մեր միջնորդությունը չքննելը ճանաչվի կոնվենցիային հակասող, և Վերաքննիչ դատարանը քննության առնի մեր միջնորդությունը և բավարարի: Եթե մենք պնդում ենք որ դատարանը, չքննելով, խախտում է Քոչարյանի իրավունքները, ապա պետք է մի ատյան քննարկի՝ արդյոք այդ կերպ չի՞ խախտվում Ռ. Քոչարյանի իրավունքը»:
Հայկ Ալումյանը ներկայացրեց այն հիմքերը, ըստ որոնց, իրենց պնդմամբ, Ռ. Քոչարյանը գտնվում է անազատության մեջ՝ մեկնաբանելով 300 և 300.1 հոդվածների միջև առկա տարբերությունները :
«2008 թվականին 300.1 հոդվածը գոյություն չի ունեցել, և այդ հիմքով քրեական պատասխանատվությունից ազատվել են 7 անձ , ինչպես նաև Նիկոլ Փաշինյանի նկատմամբ այդ հիմքով է դադարեցված եղել քրեական հետապնդումը, որովհետև 300.1 հոդվածը 2009 թվականին է մտել ուժի մեջ և սահմանել նոր հանցակազմ: Ուրեմն եթե այս չափանիշը կիրառում են Քոչարյանի նկատմամբ, եթե այդ նույն չափանիշը կիրառեին այն ժամանակ Նիկոլ Փաշինյանի նկատմամբ, ինքը մինչև այսօր պատիժ էր կրելու»:
Հայկ Ալումյանն անդրադարձավ նաև ԲԴԽ-ի կողմից Փաստաբանների պալատ ներկայացրած բողոքին՝ նշելով որ այն վերաբերում է Ռ. Քոչարյանի երկու փաստաբաններին և Յուրի Խաչատուրովի պաշտպանին, նշելով, որ դիմումը անտրամաբանական և օրենքի հետ կապ չունի.
«Նա այսքան տարի դատարանի դատավոր և նախագահ է եղել և իր պատկերացումը սա է՝ եթե փաստաբանը դատական նիստից դուրս նստել է դատախազի աթոռին, դա վիրավորական է դատախազի համար: Դուք պատկերացնո՞ւմ եք այն դժբախտներին, որ դժբախտություն են ունեցել այս մարդու մոտ դատվել: Պատկերացնո՞ւմ եք այս մարդու պատկերացումը արդարադատության և կողմերի հավասարության մասին : Նախ նշեմ, որ Միհրան Պողոսյանի՝ դատավորի աթոռին նստելն ակցիա չէր, և եթե մի բան օրենքով արգելված չէ, ո՞նց կարող է ԲԴԽ նախագահը այդ գործողությունը համարել անհարգալից վերաբերմունք և դիմել Փաստաբանների պալատ»: