Ուսանողների նախաձեռնությունը․ ինֆոքարտեր՝ հատուկ արտակարգ դրության օրերին
Աջակցիր «Ա1+»-ինԱրդեն մի քանի օր է՝ տարբեր սոցիալական ցանցերում շրջանառվում են ինֆորմացիոն քարտեր, որոնք հակիրճ և գունազարդ կերպով ներկայացնում են տեղեկատվություն, ինչն օգտակար կլինի քաղաքացիներին Արտակարգ դրության օրերին։
Ինֆոքարտերի հեղինակները ԵՊՀ-ի ուսանողներ են՝ Եվրոպական լեզուների և հաղորդակցության ֆակուլտետից Լևոն Առաքելյանն ու Աշխարհագրության և երկրաբանության ֆակուտետից Համազասպ Ավետիսյանը։
«Միտքը ծագեց, երբ տեսանք, որ յուրաքանչյուր օգտատեր իր անհատական էջում որոշակի օգտակար ինֆորմացիա է տալիս, բայց դա հասանելի է հանրության միայն ստվար զանգվածի համար։ Ուստի որոշեցինք համակարգել տեղեկատվությունը, ամփոփել , տալ ավելի ժամանակակից տեսք և տարածել»,- մանրամասնում է Լևոն Առաքելյանը։
Առաջին ինֆորմացիոն քարտի մեջ ներառված էին առաքման ծառայություններ մատուցող ընկերությունները:
«Տեսնելով խանութների եռուզեռը՝ որոշեցինք առաքման ընկերությունների տվյալները ամփոփել մեկ ինֆոքարտում, որը նաև կօգնի մարդկանց հաճախակի տանից դուրս չգալ և օգտվել ծառայություններից»,- նշում է Լևոն Առաքելյանը։
Ինֆորմացիայի տեղատարափի մեջ շատ հաճախ աչքից վրիպում է կարեւոր տեղեկատվությունը: «Մենք կարևոր ինֆորմացիան վերցնում ենք և սարքում ինֆո քարտը»,-շարունակում է Համազասպ Ավետիսյանը:
Ինֆոքարտերի շրջանառությունը Ֆեյսբուքում զարմացրել է հեղինակներին։ «Լսարանի արձագանքը հաճելիորեն զամացնող էր, առաջին նկարները ունեցան 100-ից ավել share թե անձնական էջերում ,թե խմբերում, և ինֆորմացիան վստահաբար հասավ բազմաթիվ մարդկանց, որոնք ուղղակիորեն կարող էին չտիրապետել նման ինֆորմացիայի»,- հայտնում է Լևոն Առաքելյանը:
Ինֆորմացիոն քարտերի համահեղինակ Համազասպ Ավետիսյանը նշում է, որ սա այն դեպքն է , երբ թիրախային խումբը շատ լայն է, և քարտերը ստեղծված են բոլորի համար:
«Խուճապային իրավիճակներից որևէ մեկս ապահովագրված չենք, իսկ նմանատիպ իրավիճակներում վարքագծային փոփոխություններն ակնհայտ են և նման քարտերը գալիս են հերթական անգամ ասելու՝ խուճապի կարիք չկա ու նման իրավիճակներում էլ կան ելքեր»,- նշում է Համազասպ Ավետիսյանը:
Նա նշում է ՝ չգիտեն՝ ինչպես կզարգանա գաղափարը հետագայում, գուցե շարունակեն ձեւաչափը նաև արտակարգ իրավիճակից հետո, բայց փաստում են, որ ցանկությունը եղել է մեկը՝ իրենց կողմից փոքրիկ աջակցություն այս իրավիճակում:
