Տուրիստական միկրոավտոբուսների վարորդները բողոքի ակցիա էին անում քաղաքապետարանի առջեւ (տեսանյութ)
Աջակցիր «Ա1+»-ինՏուրիստական միկրոավտոբուսների վարորդներին դեկտեմբերի 25-ից արգելվել է ավտոբուսները կայանել Հանրապետության հրապարակի տարածքում: Նրանք այսօր հավաքվել էին Երեւանի քաղաքապետարանի մոտ։ Նրանց պնդմամբ ՝ գրեթե երկու ամիս չաշխատելու պատճառով իրենք նաև ֆինանսական կորուստներ են կրել: 10 տարի շարունակ ավտոբուսները կայանել են հրապարակի տարածքում:
Ակցիայի մասնակիցները պահանջում են իրենց տրամադրել կայանատեղիներ, որոնք չեն խանգարի երթևեկությանը ։ Վարորդները պատրաստակամ են նաև վճարել հարկեր։
«Մեզ չեն կարող առաջարկել այնպիսի վայր, որ հարմար չէ: Մեզ ասում են՝ այստեղ չի կարելի կայանել, որովհետև խաչմերուկ է համարվում, բայց էստեղ ոչ մի խաչմերուկ չկա, մեր առաջարկն այն է, որ մեկ գծով միայն տուրիստական մեքենաները կանգնեն»,- նշում է վարորդներից մեկը։
Ակցիայի մասնակիցներին հանդիպեց քաղաքապետարանի տրանսպորտի վարչության պետ Էդգար Գալստյանը։ Նա նշեց՝ իրենք հիմա քննարկում են այն հարցը, թե քաղաքում որտեղ պետք է կայանմանը հարմար տեղեր սահմանեն տուրիստական միկրոավտոբուսների համար։
Խոսքը Երևանի փոքր կենտրոնի մասին է, ինչպես նաև քննարկվել են Սախարովի և Շահումյանի հրապարակների տարբերակները։
Սակայն վարորդները պնդում են, որ այդ տարածքներում զբոսաշրջիկների հոսք չկա, և իրենք չեն պատրաստվում գնալ այնտեղ։
Զբոսաշրջիկների հոսքը կարող է լինի կառավարության մուտքի մոտ, ի՞նչ է, պե՞տք է տանեք այդտեղ կանգնեցնեք տուրիստական ավտոբուսները,- ասաց Էդգար Գալստյանը։
Տրանսպորտի վարչության պետ Էդգար Գալստյանը ասաց, որ օրվա վերջում հարցի լուծման տարբերակներ կառաջարկեն ակցիայի մասնակիցներին։
